महत्वाच्या बातम्या

तिरोड्यात अवैध रेती वाहतुकीवर महसूल विभागाचा सर्जिकल स्ट्राईक : दोन ट्रॅक्टर जप्त

विदर्भ न्यूज एक्सप्रेस
तालूका प्रतिनिधी / तिरोडा : तालुक्यात गेल्या काही दिवसांपासून मोठ्या प्रमाणात रेतीची अवैध वाहतूक सुरू असल्याच्या तक्रारी प्राप्त होत होत्या. या पार्श्वभूमीवर महसूल विभागाने धडक कारवाई करत तिरोडा ते कवलेवाडा मार्गावरील पाणीटाकी परिसरात पहाटेच्या सुमारास दोन रेती भरलेले ट्रॅक्टर पकडले. या कारवाईमुळे रेती माफियांमध्ये मोठी खळबळ उडाली आहे.

नेमकी घटना काय?
मंगळवारी (२१) पहाटे ४ वाजताच्या सुमारास ही कारवाई करण्यात आली. ट्रॅक्टरद्वारे अवैध रेतीची चोरटी वाहतूक होणार असल्याची गोपनीय माहिती महसूल विभागाला मिळाली होती. तहसीलदार नारायण ठाकरे यांच्या मार्गदर्शनाखाली पथकाने सापळा रचला आणि संशयास्पद दोन ट्रॅक्टर थांबवून त्यांची तपासणी केली.

कारवाईचा तपशील -
पहिली कारवाई: ट्रॅक्टर क्रमांक MH ३६-D ८५०५ हा संशयास्पदरित्या रेतीची वाहतूक करताना आढळला. जितेंद्र डिगांबर नेवारे (रा. शास्त्री वॉर्ड, तिरोडा) हा चालक ट्रॅक्टर चालवत होता. या वाहनाचा मालक गुड्डू भैरम (रा. कवलेवाडा) असल्याचे सांगण्यात आले.

ट्रॅक्टरमध्ये अंदाजे एक ब्रास अवैध रेती दुसरी कारवाई: ट्रॅक्टर क्रमांक MH ३५-AR २०१७ यावर दुसरी कारवाई करण्यात आली. यावेळी आशिष श्रीराम चौधरी (रा. कवलेवाडा) हा चालक ट्रॅक्टर चालवत होता, तर वाहनमालक विनोद हिरामण पारधी असल्याची माहिती आहे. याही ट्रॅक्टरमध्ये सुमारे एक ब्रास रेती आढळून आली.

पुढील कायदेशीर प्रक्रिया -
जप्त करण्यात आलेली दोन्ही वाहने सध्या तहसील कार्यालयाच्या परिसरात लावून ठेवण्यात आली आहेत. या अवैध रेती उत्खनन आणि वाहतूक प्रकरणी कडक दंडात्मक कारवाई करण्यासाठी उपविभागीय अधिकाऱ्यांकडे (SDO) प्रस्ताव सादर करण्यात आला आहे.

तहसीलदार नारायण ठाकरे यांच्या नेतृत्वात झालेली ही कारवाई तालुक्यातील अवैध गौण खनिज उत्खनन करणाऱ्यांसाठी मोठा इशारा मानली जात आहे. आगामी काळातही अशाच प्रकारच्या कारवाया सुरू राहतील, असे महसूल विभागाकडून स्पष्ट करण्यात आले आहे.