Petrol Price
बंद घर फोडून लाखोंचे दागिने लंपास करणारे नागपूरचे दोन सराईत चोरटे जेरबंद : ३० लाखांचा मुद्देमाल हस्तगत
विदर्भ न्यूज एक्सप्रेस
प्रतिनिधी / चंद्रपूर : बंद घराची रेकी करून संधी साधत लाखोंचा ऐवज लंपास करणाऱ्या दोन सराईत चोरट्यांना वरोरा पोलिसांनी अटक केली आहे. लग्नसमारंभासाठी घरातील मंडळी मुंबईला गेल्याची संधी साधून चोरट्यांनी घराचे कुलूप तोडत सोन्या-चांदीचे दागिने आणि रोख रक्कम चोरी केली होती. या गुन्ह्याचा तपास करताना पोलिसांनी फूटप्रिंट आणि सीसीटीव्ही फुटेजच्या आधारे आरोपींचा शोध घेतला. त्यांच्याकडून ३० लाख ३५ हजार १९८ रुपयांचा मुद्देमाल जप्त करण्यात आला आहे. पोलिसांनी या प्रकरणात आरोपी सत्येंद्र ऊर्फ राहुल राजबहादूर गुप्ता ४१ वर्ष , रा. बाबा दिवाण मशीदजवळ, यशोधरानगर, नागपूर आणि प्रेम शालीकराम खत्री ३५ वर्ष, रा. नौकन्या नगर, नागपूर या दोघांना १० नोव्हेंबर रोजी अटक केली. दोन्ही आरोपी नागपूर येथील रहिवासी असून, त्यांच्याकडून चोरीचा बहुतांश ऐवज हस्तगत करण्यात पोलिसांना यश आले.
वरोरा येथील हनुमान व्यायामशाळेजवळ राहणाऱ्या समीना अलीअसगर बोहरा या १ नोव्हेंबर रोजी कुटुंबासह लग्नसमारंभासाठी मुंबईला गेल्या होत्या. घराला कुलूप असल्याची संधी साधून चोरट्यांनी घरात प्रवेश केला. मुख्य दरवाजाचे कुलूप तोडून बेडरूममधील लोखंडी कपाट फोडण्यात आले. त्यातील लॉकरमधून सोन्या-चांदीचे दागिने आणि रोख रक्कम असा २६ लाख १० हजार रुपयांचा ऐवज चोरट्यांनी लंपास केला. ५ नोव्हेंबर रोजी घरी परतल्यानंतर हा प्रकार उघडकीस आला.
घर पाच दिवस बंद असल्याने चोरीची नेमकी वेळ निश्चित करणे कठीण होते. मात्र, वरोरा पोलिसांच्या गुन्हे शोध पथकाने घटनास्थळावरील प्रत्येक पुराव्याची बारकाईने तपासणी केली. यावेळी घराच्या आवारातील लोखंडी गेटवर चपलांच्या तळव्यांचे ठसे आढळले. त्यानंतर परिसरातील सीसीटीव्ही फुटेज तपासले असता मध्यरात्रीच्या सुमारास एक कार संशयास्पदरीत्या फिरताना दिसली. पोलिसांनी या कारचा माग काढत आरोपींपर्यंत पोहोचण्याची मोहीम राबवली. अखेर तांत्रिक तपास आणि उपलब्ध पुराव्यांच्या आधारे दोघांना अटक करण्यात आली.
आरोपींकडून २१०.६५ ग्रॅम सोन्याचे दागिने, ५४.३८ ग्रॅम चांदीचे शिक्के व डबी, २५ हजार रुपये रोख, दोन अँड्रॉइड मोबाईल आणि एक साधा मोबाईल असा एकूण ३० लाख ३५ हजार १९८ रुपयांचा मुद्देमाल जप्त करण्यात आला. घटनास्थळी मिळालेले चपलांचे ठसे आरोपींच्या चपलांशी जुळले, तर सीसीटीव्हीमध्ये दिसणाऱ्या टी-शर्टशी संबंधित कपडाही पोलिसांनी जप्त केला. त्यामुळे या घरफोडीचा छडा लावण्यात पोलिसांना मोठे यश मिळाले. सदर कारवाई पोलीस अधीक्षक आयुष नोपानी, अपर पोलीस अधीक्षक ईश्वर कातकडे, प्रभारी उपविभागीय पोलीस अधिकारी प्रमोद चौगुले यांच्या मार्गदर्शनाखाली ठाणेदार ओमप्रकाश सोनटक्के यांचा नेतृत्वात सहाय्यक पोलीस निरीक्षक दहीफळे, गुन्हे शोध पथकाचे प्रमुख पोलीस उपनिरीक्षक मनीष तालेवार, पोलीस हवालदार संदीप मुळे, प्रशांत नागोसे, विशाल राजुरकर, मनोज ठाकरे, अमोल नवघरे, सुखश्रान यादव, महेश गावतुरे आणि सौरभ कुलथे यांनी केले.
