Petrol Price
वैनगंगा नदीपात्रातून रेतीची अवैध वाहतूक : ट्रॅक्टर-ट्रॉलीवर कारवाई
- स्थानिक गुन्हे शाखेची मोहाडी तालुक्यात कारवाई; विनापरवाना रेती वाहतूकप्रकरणी गुन्हा दाखल
विदर्भ न्यूज एक्सप्रेस
प्रतिनिधी / भंडारा : मोहाडी तालुक्यातील रोहा येथील वैनगंगा नदीपात्रातून विनापरवाना रेतीची अवैध वाहतूक करणाऱ्या ट्रॅक्टर-ट्रॉलीवर स्थानिक गुन्हे शाखेच्या पथकाने कारवाई केली. ही घटना २४ ऑक्टोबर रोजी दुपारी सुमारे १२.३० वाजताच्या दरम्यान घडली. या प्रकरणी पोलिस हवालदार अमोल तुमाने यांच्या तक्रारीवरून मोहाडी पोलिस ठाण्यात गुन्हा दाखल करण्यात आला आहे.
प्राप्त माहितीनुसार, स्थानिक गुन्हे शाखेचे पथक मोहाडी परिसरात गस्त घालत असताना रोहा येथील वैनगंगा नदीपात्रातून ट्रॅक्टर-ट्रॉलीच्या माध्यमातून रेतीची चोरी करून विनापरवाना वाहतूक केली जात असल्याची माहिती पोलिसांना मिळाली. या माहितीच्या आधारे पथकाने संबंधित ठिकाणी जाऊन पाहणी केली.
यावेळी नदीपात्रातून रेती भरून एका निळ्या रंगाच्या विनाक्रमांकाच्या ट्रॅक्टर-ट्रॉलीद्वारे वाहतूक केली जात असल्याचे आढळून आले. रेती वाहतुकीसाठी आवश्यक परवानगी नसल्याचे निदर्शनास आल्यानंतर पोलिसांनी कारवाई केली. या प्रकरणी पोलिस हवालदार अमोल तुमाने यांच्या तक्रारीवरून मोहाडी पोलिस ठाण्यात संबंधितांविरुद्ध गुन्हा नोंदविण्यात आला आहे. पुढील तपास मोहाडी पोलिस करीत आहेत.
वैनगंगा नदीपात्रातून होणाऱ्या रेतीच्या अवैध उत्खनन व वाहतुकीमुळे नैसर्गिक संपत्तीचे नुकसान होण्याची शक्यता असते. त्यामुळे अशा प्रकारांवर आळा घालण्यासाठी महसूल विभाग आणि पोलिस प्रशासनाने नियमित गस्त व कठोर कारवाई करावी, अशी अपेक्षा व्यक्त होत आहे.
