Petrol Price
मांढळ शिवारात बिबट्याचा वावर : हल्ल्यात शेतकरी जखमी
- बिबट्याला पकडण्यासाठी पिंजरा लावला; ड्रोनद्वारे शोधमोहीम, वनविभागाची गस्त वाढविली
विदर्भ न्यूज एक्सप्रेस
तालुका प्रतिनिधी / लाखांदूर : शेतातील धान पिकाची पाहणी करून परतत असताना बिबट्याने हल्ला केल्याने मांढळ येथील शेतकरी जखमी झाल्याची घटना २५ ऑक्टोबर रोजी दुपारी १२ वाजताच्या सुमारास घडली. राहुल प्रकाश देशपांडे ४२ वर्षे रा. मांढळ असे जखमी शेतकऱ्याचे नाव आहे. या घटनेनंतर वनविभाग सतर्क झाला असून, बिबट्याला पकडण्यासाठी घटनास्थळी पिंजरा लावण्यात आला आहे. तसेच परिसरात गस्त वाढवून ड्रोनच्या साहाय्याने बिबट्याचा शोध घेण्यात आला. मात्र, बिबट्या ड्रोन कॅमेऱ्यात दिसून आला नसल्याची माहिती वनविभागाकडून देण्यात आली.
धान पिकाची पाहणी करून परतताना हल्ला -
राहुल देशपांडे हे आपल्या मालकीच्या शेतशिवारातील लागवडीखालील धान पिकाची पाहणी करण्यासाठी गेले होते. पाहणी करून परतत असताना धान पिकात दबा धरून बसलेल्या बिबट्याने त्यांच्यावर हल्ला केला. या हल्ल्यात ते जखमी झाले. घटनेची माहिती मिळताच वनविभागाने तत्काळ दखल घेतली आणि जखमी शेतकऱ्याची रुग्णालयात भेट घेऊन त्यांच्या प्रकृतीची विचारपूस केली. यावेळी लाखांदूरचे वनपरिक्षेत्राधिकारी प्रदीप चन्ने, दिघोरी मोठीचे क्षेत्र सहाय्यक जयपाल नागपुरे, तिरखुरीचे बिट रक्षक तुकाराम डावकुरे, चंदन जारवाल यांच्यासह वनविभागाचे अधिकारी आणि कर्मचारी उपस्थित होते.
बिबट्याला पकडण्यासाठी पिंजरा; ड्रोनद्वारे शोध -
घटनेचे गांभीर्य लक्षात घेऊन वनविभागाच्या अधिकाऱ्यांनी घटनास्थळी भेट दिली. परिसरात पुन्हा अशा प्रकारची घटना घडू नये आणि बिबट्याला जेरबंद करता यावे, यासाठी घटनास्थळी पिंजरा लावण्यात आला. तसेच परिसरात बिबट्याचा वावर आहे का, याची खात्री करण्यासाठी ड्रोन कॅमेऱ्याच्या साहाय्याने शोधमोहीम राबविण्यात आली. मात्र, या मोहिमेदरम्यान बिबट्या ड्रोनच्या कॅमेऱ्यात कैद झाला नाही. त्यामुळे बिबट्या परिसरात कुठेतरी दडून बसला असण्याची शक्यता लक्षात घेऊन वनविभागाने फटाके फोडून त्याला हाकलून लावण्याचा प्रयत्न केला.
पिंजरा लावूनही बिबट्या जेरबंद नाही; गस्त वाढविली -
बिबट्याला पकडण्यासाठी पिंजरा लावूनही तो जेरबंद झाला नसल्याने वनविभागाने मांढळ परिसरातील गस्त वाढविली आहे. शेतशिवारात बिबट्याचा वावर असण्याची शक्यता लक्षात घेऊन वनकर्मचाऱ्यांकडून परिसरावर लक्ष ठेवण्यात येत आहे. सध्या धान पिकाच्या कामांसाठी शेतकऱ्यांना शिवारात जावे लागत असल्याने त्यांच्या सुरक्षिततेचा प्रश्न महत्त्वाचा बनला आहे. बिबट्याच्या हल्ल्याची घटना घडल्यामुळे शेतकऱ्यांनी शेतीची कामे करताना विशेष खबरदारी घेण्याची आवश्यकता आहे.
शेतकऱ्यांनी समूहाने शेतात जावे : प्रदीप चन्ने -
मांढळ परिसरातील शेतकऱ्यांनी शेतावर जाताना एकट्याने न जाता समूहाने जावे. शेतात जाताना आवाज करावा किंवा मोबाईलवर मोठ्या आवाजात गाणी लावावीत. तसेच आजूबाजूच्या परिसरावर लक्ष ठेवून सतर्कतेने शेतीची कामे करावीत, असे आवाहन वनपरिक्षेत्राधिकारी प्रदीप चन्ने यांनी केले आहे. धान पिकात किंवा दाट झुडपांमध्ये बिबट्या लपलेला असण्याची शक्यता लक्षात घेऊन शेतकऱ्यांनी काळजी घ्यावी. बिबट्या दिसल्यास त्याच्या जवळ जाणे किंवा त्याला स्वतःहून हाकलण्याचा प्रयत्न करणे टाळावे आणि तत्काळ वनविभागाला माहिती द्यावी.
मांढळ शिवारात बिबट्याच्या वावरामुळे शेतकऱ्यांमध्ये सतर्कतेची गरज निर्माण झाली आहे. वनविभागाकडून पिंजरा लावणे, ड्रोनद्वारे शोध घेणे आणि गस्त वाढविणे अशा उपाययोजना करण्यात येत असून, बिबट्याला जेरबंद करण्यासाठी प्रयत्न सुरू आहेत.
