Petrol Price
१२ दिवसांपासून तरुण बेपत्ता : अपहरणाचा संशय, भावाची पोलिसांत तक्रार
विदर्भ न्यूज एक्सप्रेस
प्रतिनिधी / वर्धा : शहरातील दयाल नगर परिसरातील ३५ वर्षीय तरुण मागील १२ दिवसांपासून बेपत्ता असल्याने परिसरात चिंतेचे वातावरण आहे. अंकुश हिरामण खिल्लारे असे बेपत्ता तरुणाचे नाव असून, सर्वत्र शोध घेऊनही त्याचा ठावठिकाणा लागलेला नाही. त्यामुळे त्याचे अपहरण झाले असावे, असा संशय त्याच्या भावाने व्यक्त केला आहे. याप्रकरणी वर्धा शहर पोलिसांत तक्रार दाखल करण्यात आली आहे.
मिळालेल्या माहितीनुसार, अंकुश खिल्लारे हा खासगी वाहनांवर चालक म्हणून काम करतो. १४ ऑक्टोबर रोजी सकाळी तो नेहमीप्रमाणे घरातून बाहेर पडला होता. मात्र, रात्री उशिरापर्यंत तो घरी परतला नाही. सुरुवातीला तो कामानिमित्त बाहेर असावा, असे कुटुंबीयांना वाटले. मात्र, बराच वेळ उलटूनही तो घरी न परतल्याने कुटुंबीयांनी त्याचा शोध घेण्यास सुरुवात केली.
नातेवाइकांसह परिचितांकडे आणि संभाव्य ठिकाणी शोध घेऊनही अंकुशचा काहीच पत्ता लागला नाही. त्याच्याशी संपर्क साधण्याचे प्रयत्नही करण्यात आले. मात्र, त्याच्याबाबत कोणतीही ठोस माहिती मिळाली नसल्याने कुटुंबीयांची चिंता वाढली आहे.
अंकुश मागील १२ दिवसांपासून बेपत्ता असल्याने त्याच्या भावाने शहर पोलिसांत तक्रार दाखल केली. तसेच अंकुशचे अपहरण झाले असावे, असा संशयही व्यक्त केला आहे. या तक्रारीच्या आधारे पोलिसांकडून प्रकरणाची दखल घेण्यात आली आहे.
दरम्यान, अंकुश खिल्लारे याच्याबाबत कोणाला काही माहिती मिळाल्यास ती पोलिसांना कळविणे महत्त्वाचे ठरणार आहे. बेपत्ता तरुणाचा शोध लागण्याकडे त्याच्या कुटुंबीयांचे लक्ष लागले आहे.
