Petrol Price
शंभर टक्के अनुदानावर चारा बियाणे वाटप : पशु पालकांकडून अर्ज आमंत्रित
- ३१ ऑक्टोबरपर्यंत अर्ज करण्याचे आवाहन; संभाव्य दुष्काळाच्या पार्श्वभूमीवर चारा उत्पादन वाढविण्यावर प्रशासनाचा भर
विदर्भ न्यूज एक्सप्रेस
प्रतिनिधी / गडचिरोली : संभाव्य दुष्काळी परिस्थितीच्या पार्श्वभूमीवर जिल्ह्यात पशुधनासाठी चाऱ्याची उपलब्धता वाढविण्याच्या दृष्टीने शंभर टक्के अनुदानावर चारा बियाणे वितरित करण्यात येणार आहे. सिंचनाची सुविधा असलेल्या इच्छुक शेतकरी व पशुपालकांनी या योजनेचा लाभ घेण्यासाठी ३१ ऑक्टोबर २०२६ पर्यंत अर्ज सादर करावेत, असे आवाहन जिल्हा उपायुक्त पशुसंवर्धन व दुग्धव्यवसाय कार्यालय, गडचिरोली यांनी केले आहे.
जिल्ह्यात सध्या उपलब्ध असलेला चारा सुमारे तीन महिने पुरेल इतकाच असल्याने भविष्यात पशुधनासाठी चाऱ्याची टंचाई निर्माण होण्याची शक्यता आहे. ही परिस्थिती लक्षात घेऊन चारा उत्पादन वाढविणे, चारा बियाण्यांचे वितरण करणे आणि उपलब्ध चाऱ्याचे योग्य व्यवस्थापन करणे यावर प्रशासनाने भर दिला आहे.
चारा उत्पादन वाढविण्यासाठी विशेष नियोजन -
जिल्हाधिकारी अविश्यांत पंडा यांच्या मार्गदर्शनाखाली पशुसंवर्धन विभाग आणि कृषी विभाग यांच्या संयुक्त विद्यमाने चारा उपलब्धतेबाबत नियोजन करण्यात येत आहे. सिंचनाची सुविधा असलेल्या शेतांमध्ये हिरव्या चाऱ्याचे उत्पादन वाढवून पशुधनासाठी चारा उपलब्ध करून देण्याचा या उपक्रमाचा उद्देश आहे.
यासोबतच भविष्यातील चारा टंचाईचा सामना करण्यासाठी मुरघास निर्मितीला प्रोत्साहन देण्यात येणार आहे. हिरवा चारा योग्य पद्धतीने साठवून त्याचे पौष्टिक मूल्य टिकवून ठेवणे शक्य होत असल्याने पशुपालकांनी मुरघास निर्मितीकडे लक्ष द्यावे, यासाठीही प्रयत्न केले जाणार आहेत.
पशुवैद्यकीय दवाखान्यांच्या क्षेत्रात शेतकरी मेळावे -
चारा उत्पादन, साठवणूक आणि पशुधनाच्या पोषणाबाबत शेतकरी व पशुपालकांमध्ये जनजागृती करण्यासाठी जिल्ह्यातील प्रत्येक पशुवैद्यकीय दवाखान्याच्या कार्यक्षेत्रात शेतकरी मेळावे आयोजित करण्यात येणार आहेत.
या मेळाव्यांमध्ये सुका व हिरवा चारा योग्य पद्धतीने साठविणे, मुरघास तयार करण्याची पद्धत, चाऱ्यातील पौष्टिकता टिकवून ठेवणे तसेच जनावरांना आवश्यक खनिजद्रव्ये व पूरक पोषण योग्य प्रमाणात देणे याबाबत तज्ज्ञांकडून मार्गदर्शन करण्यात येणार आहे.पशुधनाचे आरोग्य टिकविण्यासाठी संतुलित आहार आणि पुरेशा प्रमाणात चारा उपलब्ध असणे महत्त्वाचे आहे. त्यामुळे चारा उत्पादनासोबतच त्याचे योग्य व्यवस्थापन करण्यावरही भर दिला जाणार आहे.
अर्ज कुठे करायचा? -
शंभर टक्के अनुदानावर चारा बियाणे मिळविण्यासाठी इच्छुक शेतकरी व पशुपालकांनी ३१ ऑक्टोबर २०२६ पर्यंत संबंधित पंचायत समितीतील तालुका पशुसंवर्धन अधिकारी किंवा जिल्हा उपायुक्त पशुसंवर्धन व दुग्धव्यवसाय कार्यालय, गडचिरोली येथे अर्ज सादर करावेत.
अर्जाचा नमुना संबंधित पंचायत समिती स्तरावर उपलब्ध करून देण्यात आला आहे. त्यामुळे सिंचनाची सुविधा असलेल्या पात्र शेतकरी व पशुपालकांनी मुदतीत अर्ज सादर करून या योजनेचा लाभ घ्यावा, असे आवाहन पशुसंवर्धन विभागाने केले आहे.
संभाव्य चारा टंचाई लक्षात घेता, चारा उत्पादनात वाढ करणे आणि उपलब्ध चाऱ्याचे योग्य नियोजन करणे आवश्यक आहे. या पार्श्वभूमीवर शंभर टक्के अनुदानावरील चारा बियाणे वितरण योजना पशुपालकांसाठी महत्त्वपूर्ण ठरणार असून, इच्छुकांनी निर्धारित मुदतीत अर्ज करण्याचे आवाहन प्रशासनाने केले आहे.
