Petrol Price
नागपूर विभाग पदवीधर मतदार संघातील मतदारांना मतदानासाठी चार तासांची विशेष सवलत
- खासगी आस्थापनांतील पात्र कर्मचाऱ्यांना मतदानाचा हक्क बजावण्याचे आवाहन
विदर्भ न्यूज एक्सप्रेस
प्रतिनिधी / नागपूर : नागपूर विभाग पदवीधर मतदारसंघाच्या द्विवार्षिक निवडणुकीसाठी शुक्रवार, २३ ऑक्टोबर २०२६ रोजी मतदान होणार आहे. या निवडणुकीत मतदानाचा हक्क बजावता यावा, यासाठी खासगी आस्थापनांमध्ये कार्यरत असलेल्या पदवीधर मतदारांना दोन तासांऐवजी चार तासांची विशेष सवलत देण्याचे निर्देश देण्यात आले आहेत. संबंधित खासगी आस्थापनांच्या मालकांनी पात्र कर्मचाऱ्यांना मतदानासाठी आवश्यक सवलत द्यावी, असे आवाहन करण्यात आले आहे.
भारत निवडणूक आयोगाने २२ सप्टेंबर २०२६ रोजी प्रसिद्धिपत्रकाद्वारे नागपूर विभाग पदवीधर मतदारसंघाच्या द्विवार्षिक निवडणुकीचा कार्यक्रम जाहीर केला आहे. या निवडणुकीसाठी २३ ऑक्टोबर रोजी सकाळी ८ ते दुपारी ४ या वेळेत मतदान होणार आहे. यापूर्वी खासगी आस्थापनांमध्ये कार्यरत असलेल्या मतदारांना मतदानासाठी दोन तासांची विशेष सवलत देण्याबाबत कळविण्यात आले होते. मात्र, काही मतदान केंद्रे दूर अंतरावर असल्याने तेथे पोहोचण्यासाठी लागणारा वेळ विचारात घेऊन ही सवलत दोन तासांऐवजी चार तास करण्याचे निर्देश देण्यात आले आहेत.
नागपूर विभाग पदवीधर मतदारसंघातील मतदार असलेल्या कर्मचाऱ्यांना २३ ऑक्टोबर रोजी मतदानाचा हक्क बजावता यावा, यासाठी संबंधित खासगी आस्थापनाधारकांनी चार तासांची विशेष सवलत देण्याबाबत योग्य ती दक्षता घ्यावी, असे आवाहन अपर कामगार आयुक्त किशोर दहिफळकर यांनी केले आहे.
