Petrol Price
पंडित जवाहरलाल नेहरू यांच्या जयंतीनिमित्त राजुरा काँग्रेसतर्फे भावपूर्ण अभिवादन
विदर्भ न्यूज एक्सप्रेस
तालुका प्रतिनिधी / राजुरा : भारताचे पहिले पंतप्रधान, महान स्वातंत्र्यसैनिक आणि आधुनिक भारताच्या उभारणीचे शिल्पकार भारतरत्न पंडित जवाहरलाल नेहरू यांच्या जयंतीनिमित्त राजुरा विधानसभा काँग्रेसच्या वतीने त्यांच्या स्मृतींना भावपूर्ण अभिवादन करण्यात आले. तहसील कार्यालयाजवळील राजुरा विधानसभा काँग्रेसच्या जनसंपर्क कार्यालयात आयोजित कार्यक्रमात नेहरू यांच्या प्रतिमेला पुष्पहार अर्पण करून उपस्थित मान्यवरांनी आदरांजली वाहिली.
देशाच्या स्वातंत्र्यासाठी आयुष्य समर्पित करणारे आणि स्वातंत्र्यानंतर आधुनिक भारताच्या उभारणीचा भक्कम पाया रचणारे पंडित जवाहरलाल नेहरू यांचे योगदान देशाच्या इतिहासात सदैव सुवर्णाक्षरांनी नोंदले जाईल. लोकशाही मूल्ये, धर्मनिरपेक्षता, वैज्ञानिक दृष्टिकोन आणि शिक्षणाच्या प्रसारासाठी त्यांनी केलेले कार्य आजही देशाला प्रेरणा देणारे आहे. बालकांवर विशेष प्रेम करणाऱ्या नेहरूंना मुले प्रेमाने चाचा नेहरू म्हणून संबोधत. त्यांच्या जयंतीनिमित्त साजरा होणारा बालदिन हा बालकांच्या उज्ज्वल भविष्याविषयी त्यांनी पाहिलेल्या स्वप्नांची आठवण करून देणारा आहे.
कार्यक्रमाच्या अध्यक्षस्थानी राजुरा विधानसभा काँग्रेसचे समन्वयक तथा नगराध्यक्ष अरुण धोटे होते. यावेळी काँग्रेसचे शहराध्यक्ष हरजीतसिंग संधू, सभापती तिरुपती इंदूरवार, माजी सभापती विकास देवाळकर, नगरपरिषद सभापती अनंतकुमार ताजने, ज्येष्ठ नागरिक संघाचे सचिव कुर्मदास पावडे, माजी नगरसेवक विलास तुमाने, धनराज चिंचोलकर, आनंदराव गावंडे, सर्वानंद वाघमारे, अशोक राव, इर्शाद शेख, नौशाद शेख, योगेश बोढे, हेमंत झाडे यांच्यासह काँग्रेसचे पदाधिकारी, कार्यकर्ते आणि नागरिक उपस्थित होते.
