Petrol Price
संत नागाजी महाराजांच्या विचारांतून समता, सद्भावना आणि सेवेची प्रेरणा : आ. किशोर जोरगेवार
- इंदिरानगर येथे संत नागाजी महाराज जयंती महोत्सव उत्साहात साजरा; आमदार किशोर जोरगेवार यांचे अभिवादन
विदर्भ न्यूज एक्सप्रेस
प्रतिनिधी / चंद्रपूर : संतांचे विचार समाजाला योग्य दिशा देण्यासोबतच माणुसकी, समता आणि बंधुभावाची शिकवण देतात. संत नागाजी महाराज यांनी धार्मिक व सामाजिक क्षेत्रात दिलेले योगदान मोलाचे असून, त्यांच्या विचारांतून समाजाला समता, सद्भावना, सेवाभाव आणि समाजहिताची प्रेरणा मिळते. त्यांच्या विचारांचा आदर्श समोर ठेवून समाजाने एकोप्याने प्रगतीच्या दिशेने वाटचाल करावी, असे प्रतिपादन आमदार किशोर जोरगेवार यांनी केले.
चंद्रपूर शहरातील इंदिरानगर येथे नाभिक कल्याण समितीच्या वतीने संत नागाजी महाराज यांच्या जयंतीनिमित्त आयोजित महोत्सवात आमदार किशोर जोरगेवार उपस्थित होते. यावेळी त्यांनी संत नागाजी महाराज यांच्या प्रतिमेला माल्यार्पण करून पूजन केले व विनम्र अभिवादन केले. तसेच उपस्थित समाजबांधवांना जयंती महोत्सवाच्या शुभेच्छा दिल्या.
यावेळी बोलताना आमदार जोरगेवार म्हणाले की, संत नागाजी महाराज यांनी आपल्या विचारांतून समाजाला समता, बंधुता, सद्भावना आणि सेवाभावाचा संदेश दिला. समाजातील प्रत्येक घटकाने परस्परांशी प्रेमाने व आपुलकीने वागून समाजहिताला प्राधान्य द्यावे, ही त्यांची शिकवण आजही तितकीच महत्त्वाची आहे. संतांचे विचार केवळ जयंती उत्सवापुरते मर्यादित न ठेवता ते आपल्या दैनंदिन आचरणात आणणे, हीच त्यांना खरी आदरांजली ठरेल, असेही त्यांनी सांगितले.
याप्रसंगी समितीचे अध्यक्ष शंकराव नक्षिणे, सचिव दिनेश दहिवलकर, प्रेमलाल कडूकर, मनोहर कडूकर, अनिल बडवाईक, मोरेश्वर नागपूरे, ईश्वर लाखडे, रत्नाकर चौधरी, नारायण आसकर यांच्यासह समितीचे पदाधिकारी व समाजबांधव मोठ्या संख्येने उपस्थित होते. भक्तिभाव, उत्साह आणि सामाजिक एकतेच्या वातावरणात संत नागाजी महाराज जयंती महोत्सव उत्साहात साजरा करण्यात आला.
