Petrol Price
हत्तींच्या कळपाचा धानशेतीत धुडगूस : कापणीपूर्वीच पिके उद्ध्वस्त
- साखरा, काटली चक परिसरातील पाच-सहा शेतकऱ्यांचे नुकसान; चुरचुरा परिसरातही कळपाचा संचार
विदर्भ न्यूज एक्सप्रेस
प्रतिनिधी / गडचिरोली : पोर्ला वनपरिक्षेत्रात रानटी हत्तींच्या कळपाचा उपद्रव वाढला असून, कापणीच्या तोंडावर असलेल्या धानपिकांचे मोठ्या प्रमाणात नुकसान होत आहे. बुधवार आणि गुरुवारी रात्री रानटी हत्तींच्या कळपाने साखरा व काटली चक परिसरातील शेतांमध्ये प्रवेश करून पाच-सहा शेतकऱ्यांच्या उभ्या धानपिकांची नासधूस केली. शुक्रवारी हत्तींचा कळप चुरचुरा परिसरात दिसून आल्याने या भागातील शेतकऱ्यांमध्ये भीतीचे वातावरण निर्माण झाले आहे.
यंदाच्या खरीप हंगामात शेतकऱ्यांनी मोठ्या मेहनतीने धानपीक घेतले आहे. सध्या हलक्या धानपिकाचा निसवा पूर्ण झाला असून, काही दिवसांत या पिकाची कापणी सुरू होणार आहे. कापणीपूर्वीची तयारी सुरू असतानाच रानटी हत्तींचा कळप शेतांमध्ये घुसून उभे पीक तुडवत असल्याने शेतकऱ्यांच्या चिंतेत भर पडली आहे.
दरम्यान, मध्यम व दीर्घ मुदतीच्या धानपिकांची सध्या गर्भावस्था सुरू आहे. या पिकांचेही पुढील काळात हत्तींच्या उपद्रवापासून संरक्षण कसे करायचे, हा प्रश्न शेतकऱ्यांसमोर निर्माण झाला आहे. वर्षभर मेहनत, बियाणे, खते, औषधफवारणी आणि मजुरीवर खर्च करून उभे केलेले पीक कापणीच्या तोंडावर नष्ट होत असल्याने शेतकऱ्यांना आर्थिक नुकसान सहन करावे लागत आहे.
रात्रीच्या वेळी हत्तींची शेतांकडे धाव -
बुधवार व गुरुवारी रात्री हत्तींच्या कळपाने साखरा आणि काटली चक परिसरातील शेतांमध्ये प्रवेश केला. हत्तींनी उभ्या धानपिकातून वाट काढत मोठ्या प्रमाणात पीक तुडविले. या घटनेत पाच-सहा शेतकऱ्यांचे नुकसान झाल्याची माहिती आहे. त्यानंतर शुक्रवारी हा कळप चुरचुरा परिसरात दिसून आल्याने लगतच्या गावांतील शेतकरीही सतर्क झाले आहेत.
पंचनामे करून तत्काळ भरपाईची मागणी -
हत्तींच्या तुडवणुकीमुळे नुकसान झालेल्या शेतांची वन विभागाने तातडीने पाहणी करून पंचनामे करावेत आणि संबंधित शेतकऱ्यांना नियमानुसार नुकसानभरपाई द्यावी, अशी मागणी होत आहे. कापणीच्या काही दिवस आधीच पीक उद्ध्वस्त झाल्याने शेतकऱ्यांचे मोठे आर्थिक नुकसान झाले आहे.
रानटी हत्तींच्या वाढत्या संचारावर नियंत्रण मिळविण्यासाठी वन विभागाने ठोस उपाययोजना कराव्यात, अशीही मागणी शेतकऱ्यांकडून करण्यात येत आहे. हत्तींचा बंदोबस्त करण्यासाठी प्रभावी उपाययोजना होत नसल्याने शेतकऱ्यांमध्ये वन विभागाविरोधात नाराजी आणि रोष वाढत आहे.
कापणीच्या ऐन तोंडावर हत्तींच्या कळपामुळे धानशेती धोक्यात आल्याने प्रशासनाने तातडीने दखल घेऊन नुकसानग्रस्त शेतकऱ्यांना आर्थिक मदत द्यावी आणि भविष्यातील हत्ती-मानव संघर्ष टाळण्यासाठी कायमस्वरूपी उपाययोजना कराव्यात, अशी मागणी जोर धरत आहे.
