Petrol Price
जिल्हास्तरीय युवा महोत्सवाच्या आयोजनासाठी नियोजन बैठक
- विकसित भारत २०२७ च्या संकल्पनेवर आधारित विविध स्पर्धांचे आयोजन
विदर्भ न्यूज एक्सप्रेस
प्रतिनिधी / भंडारा : विकसित भारत यंग लीडर्स डायलॉग अंतर्गत जिल्हास्तरीय युवा महोत्सवाच्या आयोजनाच्या अनुषंगाने जिल्हास्तरीय आयोजन समितीची बैठक आज निवासी उपजिल्हाधिकारी मनोहर चव्हाण यांच्या अध्यक्षतेखाली घेण्यात आली. बैठकीला जिल्हा क्रीडा अधिकारी लतिका लेकुरवाळी, जिल्हा माहिती अधिकारी शैलजा वाघ, माय भारत तसेच राष्ट्रीय सेवा योजना विभागाचे प्रतिनिधी उपस्थित होते.
जिल्ह्यात २६ ऑक्टोबर ते २० नोव्हेंबर या कालावधीत युवा महोत्सवाच्या अनुषंगाने विविध उपक्रम राबविण्याचे निर्देश देण्यात आले आहेत. जिल्हास्तरीय युवा महोत्सव नोव्हेंबर महिन्याच्या तिसऱ्या आठवड्यात आयोजित करण्याचे प्रस्तावित असून, याबाबत महाविद्यालयांशी प्राथमिक चर्चा सुरू आहे.
यावर्षीचा युवा महोत्सव विकसित भारत २०४७ या संकल्पनेशी जोडण्यात आला आहे. याअंतर्गत समूह लोकगीत, समूह लोकनृत्य, पथनाट्य, कविता लेखन, चित्रकला, आशुभाषण आदी विविध स्पर्धा व उपक्रमांचे आयोजन करण्यात येणार आहे. या उपक्रमांमध्ये जिल्ह्यातील अधिकाधिक युवकांचा सहभाग वाढविण्यासाठी व्यापक प्रसिद्धी करण्यात येणार आहे.
नाविन्यपूर्ण कल्पना, उपाययोजना आणि विकसित भारताच्या दृष्टीने युवकांचा दृष्टिकोन जाणून घेण्यासाठी पात्र युवकांकडून निबंध मागविण्यात येणार आहेत. त्यातून जिल्ह्यातील सर्वोत्तम ५० निबंधांची निवड करून संबंधित युवकांना आपल्या कल्पनांचे सादरीकरण करण्याची संधी देण्यात येणार आहे. ही स्पर्धा २० नोव्हेंबरपर्यंत आयोजित करण्याचे अपेक्षित असल्याचे जिल्हा क्रीडा अधिकारी लतिका लेकुरवाळे यांनी सांगितले.
यावेळी जिल्हा क्रीडा अधिकारी यांनी युवा महोत्सवाच्या आयोजनाची रूपरेषा निवासी उपजिल्हाधिकारी मनोहर चव्हाण यांच्यासमोर सादर केली. लवकरच जिल्हास्तरीय युवा महोत्सवाच्या तारखा जाहीर करण्यात येणार आहेत. जिल्ह्यातील युवक-युवतींनी या महोत्सवात मोठ्या संख्येने सहभागी होऊन आपल्यातील कला, कौशल्य, सर्जनशीलता आणि नेतृत्वगुणांना संधी द्यावी, असे आवाहन जिल्हा क्रीडा अधिकारी कार्यालयाच्या वतीने करण्यात आले आहे.
