Petrol Price
महाराष्ट्र राज्य शासकीय निवृत्तीवेतन कुटुंब निवृत्तीवेतन धारकांना सादर करता येणार डिजिटल हयातीचा दाखला
विदर्भ न्यूज एक्सप्रेस
प्रतिनिधी / गडचिरोली : महाराष्ट्र राज्य शासनाच्या निवृत्तीवेतनधारक आणि कुटुंब निवृत्तीवेतन धारकांसाठी हयातीचा दाखला सादर करण्याची प्रक्रिया आता अधिक सुलभ होणार आहे. केंद्र शासनाच्या पेंशन आणि पेंशनभोगी कल्याण विभागामार्फत १ ते ३० नोव्हेंबर २०२६ या कालावधीत देशव्यापी डिजिटल लाइफ सर्टिफिकेट (Digital Life Certificate) मोहीम राबविण्यात येत आहे. या मोहिमेअंतर्गत निवृत्तीवेतनधारकांना बँकेत प्रत्यक्ष न जाता डिजिटल पद्धतीने हयातीचा दाखला सादर करता येणार आहे.
शासकीय नियमानुसार निवृत्तीवेतनधारक आणि कुटुंब निवृत्तीवेतनधारकांना दरवर्षी नोव्हेंबर महिन्यात आपला हयातीचा दाखला सादर करणे आवश्यक असते. यापूर्वी हा दाखला सादर करण्यासाठी अनेक ज्येष्ठ नागरिकांना बँकेत किंवा संबंधित कार्यालयात प्रत्यक्ष जावे लागत होते. त्यामुळे वयोवृद्ध, आजारी तसेच प्रवास करण्यास असमर्थ असलेल्या निवृत्तीवेतनधारकांना अडचणींचा सामना करावा लागत होता.
मात्र, डिजिटल लाइफ सर्टिफिकेट मोहिमेमुळे ही प्रक्रिया अधिक सोपी झाली आहे. निवृत्तीवेतनधारकांना जीवन प्रमाण (Jeevan Pramaan) ॲपच्या माध्यमातून डिजिटल हयातीचा दाखला सादर करण्याची सुविधा उपलब्ध करून देण्यात आली आहे. त्यामुळे घरबसल्या किंवा डिजिटल सुविधेच्या माध्यमातून हा दाखला सादर करणे शक्य होणार आहे.
तरी गडचिरोली जिल्ह्यातील सर्व राज्य शासकीय निवृत्तीवेतनधारक आणि कुटुंब निवृत्तीवेतनधारकांनी १ ते ३० नोव्हेंबर या कालावधीत डिजिटल हयातीचा दाखला सादर करण्याच्या सुविधेचा लाभ घ्यावा, असे आवाहन जिल्हा कोषागार अधिकारी, गडचिरोली यांनी केले आहे.
