Petrol Price
जिल्हा ग्रंथालय अधिकारी कार्यालयात वाचन प्रेरणा दिन साजरा
- उपविभागीय पोलीस अधिकाऱ्यांच्याहस्ते पुस्तक प्रदर्शनीचे उद्घाटन
विदर्भ न्यूज एक्सप्रेस
प्रतिनिधी / वर्धा : भारताचे माजी राष्ट्रपती व ज्येष्ठ शास्त्रज्ञ भारतरत्न डॉ. ए. पी. जे. अब्दुल कलाम यांच्या जयंती निमित्त जिल्हा ग्रंथालय अधिकारी कार्यालय, येथे वाचन प्रेरणा दिन साजरा करण्यात आला. यानिमित्त आयोजित पुस्तक प्रदर्शनाचे उद्घाटन उपविभागीय पोलीस अधिकारी सुनील महाडीक यांच्या हस्ते फित कापून करण्यात आले. या वेळी जिल्हा ग्रंथालय संघाचे उपाध्यक्ष मिलिंद जुनगडे, जिल्हा ग्रंथालय अधिकारी नितीन सोनवणे, कार्यालयातील कर्मचारी कल्पेश पारधी व रामप्रसाद बुवाडे यांच्यासह वाचक आणि विद्यार्थी उपस्थित होते.
डॉ. कलाम यांनी आपल्या कार्यातून शिक्षण, विज्ञान, संशोधन आणि ज्ञानार्जनाचे महत्त्व अधोरेखित केले होते. विद्यार्थ्यांनी मोठी स्वप्ने पाहावीत, ज्ञान मिळविण्यासाठी सातत्याने प्रयत्न करावेत आणि वाचनाच्या माध्यमातून स्वतःचा व्यक्तिमत्त्व विकास साधावा, हा त्यांच्या विचारांचा मुख्य आशय होता. त्यांच्या प्रेरणादायी जीवनकार्याची आठवण करून देणाऱ्या या दिनानिमित्त वाचन संस्कृतीचा प्रसार आणि विद्यार्थ्यांमध्ये पुस्तकांविषयी आवड निर्माण करण्यावर भर देण्यात आला.
कार्यक्रमाच्या निमित्ताने विविध विषयांवरील पुस्तकांचे प्रदर्शन भरविण्यात आले. या प्रदर्शनातून वाचक व विद्यार्थ्यांना विविध प्रकारच्या साहित्याची ओळख करून देण्यात आली. वाचनामुळे ज्ञानात भर पडण्याबरोबरच विचारशक्ती विकसित होते. त्यामुळे विद्यार्थ्यांसह सर्व वयोगटांतील नागरिकांनी नियमित वाचनाची सवय जोपासावी आणि ग्रंथालयांचा अधिकाधिक लाभ घ्यावा, असे आवाहन सुनील महाडिक यांनी केले. वाचन प्रेरणा दिनाच्या आयोजनातून वाचन संस्कृती वृद्धिंगत करण्याचा तसेच नव्या पिढीला पुस्तकांशी जोडण्याचा प्रयत्न करण्यात येत असल्याचे नितीन सोनवणे यांनी सांगितले. कार्यक्रमाला विद्यार्थी व विद्यार्थी मोठ्या संख्येने उपस्थित होते, जिल्हा ग्रंथालयाच्यावतीने कळविण्यात आले आहे.
