Petrol Price
मौजा राजोली येथे भव्य रात्रीकालीन कबड्डी स्पर्धेचा उत्साहात शुभारंभ!
- माजी खासदार डॉ. अशोकजी नेते यांच्या हस्ते उद्घाटन सोहळा संपन्न; ग्रामीण युवकांनी क्रीडा क्षेत्रात प्रावीण्य मिळवावे, असे आवाहन
विदर्भ न्यूज एक्सप्रेस
तालुका प्रतिनिधी / धानोरा : गडचिरोली जिल्ह्यातील धानोरा तालुक्यांतर्गत मौजा राजोली येथे आयोजित करण्यात आलेल्या भव्य रात्रीकालीन कबड्डी स्पर्धेचा उद्घाटन सोहळा उत्साहपूर्ण व जल्लोषमय वातावरणात संपन्न झाला. भाजपा अनुसूचित जनजाती मोर्चाचे राष्ट्रीय महामंत्री तथा माजी खासदार डॉ. अशोकजी नेते यांच्या शुभहस्ते फित कापून, दीपप्रज्वलन करून तसेच प्रतिमापूजनाने या स्पर्धेचे विधिवत उद्घाटन करण्यात आले. याप्रसंगी उपस्थित खेळाडू व ग्रामस्थांना मार्गदर्शन करताना माजी खासदार डॉ. अशोकजी नेते यांनी ग्रामीण भागातील युवकांनी शिक्षणासोबतच क्रीडा क्षेत्रातही आपले कौशल्य सिद्ध करून जिल्ह्याचे व राज्याचे नाव उज्ज्वल करावे, असे आवाहन केले.
ते पुढे म्हणाले की, कबड्डीसारखे पारंपरिक मैदानी खेळ हे केवळ मनोरंजनाचे साधन नसून युवकांच्या सर्वांगीण व्यक्तिमत्त्व विकासाचे प्रभावी माध्यम आहेत. अशा खेळांमुळे शारीरिक क्षमता, आत्मविश्वास, संघभावना, शिस्त, नेतृत्वगुण आणि खिलाडूवृत्ती विकसित होते. ग्रामीण व दुर्गम भागातील अनेक होतकरू खेळाडूंमध्ये अफाट क्रीडा गुणवत्ता दडलेली असते. मात्र, त्यांना योग्य संधी आणि व्यासपीठ मिळणे आवश्यक आहे. अशा रात्रीकालीन क्रीडा स्पर्धांमुळे स्थानिक खेळाडूंना आपले कौशल्य आणि कर्तृत्व सिद्ध करण्याची उत्तम संधी उपलब्ध होते, असे माजी खासदार डॉ. अशोकजी नेते यांनी उद्घाटनप्रसंगी प्रतिपादन केले.
या उद्घाटन सोहळ्याप्रसंगी माजी खासदार डॉ. अशोकजी नेते यांच्यासह भाजपाचे जिल्हा सचिव सारंग साळवे, गावाचे सरपंच, पोलीस पाटील, माजी पंचायत समिती सदस्य, स्थानिक पदाधिकारी, प्रतिष्ठित नागरिक, स्पर्धेचे आयोजक, क्रीडाप्रेमी तसेच परिसरातील युवक-युवती व ग्रामस्थ मोठ्या संख्येने उपस्थित होते.
मौजा राजोली येथे आयोजित या रात्रीकालीन कबड्डी स्पर्धेमुळे संपूर्ण परिसरात क्रीडामय वातावरण निर्माण झाले असून, स्पर्धेतील अटीतटीचे व रोमहर्षक सामने पाहण्यासाठी ग्रामस्थ आणि क्रीडाप्रेमींमध्ये विशेष उत्साहाचे वातावरण पाहायला मिळत आहे. स्थानिक युवकांच्या क्रीडा कौशल्याला प्रोत्साहन देणाऱ्या या उपक्रमाचे परिसरातून कौतुक होत आहे. ग्रामीण भागातील क्रीडा प्रतिभेला प्रोत्साहन देणारा ठरला.
