महत्वाच्या बातम्या

महाडीबीटी पोर्टलवर निवड झालेल्या लाभार्थ्यांना कागदपत्रे अपलोड करण्याचे आवाहन

विदर्भ न्यूज एक्सप्रेस

प्रतिनिधी / वर्धा : एकात्मिक फलोत्पादन विकास अभियान व राष्ट्रीय कृषी विकास योजनेंतर्गत महाडीबीटी पोर्टलवरील निवड झालेल्या लाभार्थ्यांनी आपले सेवा केंद्रामार्फत कागदपत्रे अपलोड करावी, असे आवाहन करण्यात आले आहे.

एकात्मिक फलोत्पादन अभियानांतर्गत १४ व्या लॉटरी सायकलमध्ये महाडीबीटी प्रणालीवर मोठ्या संख्येने लाभार्थी निवड झालेली आहे. या नव्याने निवडलेल्या लाभार्थ्यांनी नजीकच्या आपले सेवा केंद्र तसेच संबंधित तालुका कृषि कार्यालयातील क्षेत्रीय अधिकारी, कर्मचारी यांना प्रत्यक्ष संपर्क साधावा आणि आपले आवश्यक कागदपत्रे तात्काळ अपलोड करुन घ्यावी. या योजनेंतर्गत सर्वसाधारण, अनुसूचित जाती आणि अनुसूचित जमातीच्या प्रवर्गातील शेतकऱ्यांची विविध घटकाकरीता निवड झालेली आहे. यात प्रामुख्याने क्षेत्र विस्तार व पुनरुज्जीवन, पॅक हाऊस, शेडनेट हाऊस, प्लॅस्टीक मल्चींग, कांदा चाळ इत्यादी करीता मोठ्या संख्येने लाभार्थ्यांची निवड झालेली आहे.

जिल्ह्यात फलोत्पादन व भाजीपाला पिकांचे क्षेत्र व उत्पादन वाढविण्याकरीता एकात्मिक फलोत्पादन अभियान व राष्ट्रीय कृषि विकास योजना राबविण्यात येत आहे. योजनेंतर्गत फलोत्पादन पिकाचे संशोधन तंत्रज्ञान, प्रसार, काढणीत्तोर तंत्रज्ञान, प्रक्रिया व पणन सुविधा यांच्या माध्यमातुन समुह पध्दतीने सर्वागीण विकास करणे तसेच शेतकऱ्यांचे आर्थिक राहणीमान उंचावणे, पारंपारिक उत्पादन पध्दतीची आधुनिक शास्त्रीय ज्ञानाची सांगड घालुन तंत्रज्ञानाचा विकास, प्रसार व प्रचार करणे हा योजनेचा उद्देश आहे, असे जिल्हा अधीक्षक कृषि अधिकरी यांनी कळविले आहे.