महत्वाच्या बातम्या

संसद भवनात प्रवेशासाठी नवीन सुरक्षा नियम : क्यूआर कोड आणि आधार कार्डची प्रत अनिवार्य

विदर्भ न्यूज एक्सप्रेस

वृत्तसंस्था / नवी दिल्ली : नवीन संसद भवनातील घुसखोरीनंतर आता संकुलात येणाऱ्या व्यक्तींना क्यूआर कोड आणि आधार कार्डची प्रत सोबत आणावी लागणार आहे. हे बदल ३१ जानेवारीपासून सुरू होणाऱ्या अर्थसंकल्पीय अधिवेशनापासून लागू होतील.

सुरक्षाविषयक नियमांची ही नवी अमलबजावणी तीन टप्प्यात होणार आहे. या अंतर्गत संसदेचे कामकाज पाहण्यासाठी येणाऱ्या व्यक्तींना क्यूआर कोड घ्यावा लागेल. त्यांना क्यूआर कोडबरोबरच आधार कार्डची प्रिंट आउट आणावी लागेल. त्यानंतर त्याला एक स्मार्ट कार्ड दिले जाईल. टॅप आणि बायोमेट्रिक तपासणी केल्यानंतरच तो संसदेत प्रवेश करू शकेल.

संसदेतून परतताना त्याला त्याचे स्मार्ट कार्ड जमा करावे लागेल, तसे न केल्यास संबंधित व्यक्ती आपोआप ब्लॉक होऊन काळ्या यादीत टाकले जातील. त्यानंतर तो पुन्हा संसदेच्या आवारात प्रवेश करू शकणार नाही.

खासदारांना विशेष सूचना -

आपल्या कार्यकर्त्यांना आणि परिचित व्यक्तींना वा इतर कुणाची पाससाठी शिफारस करताना विशेष काळजी घेण्याची सूचना खासदारांना करण्यात आली आहे. खासदारांनी त्यांचे पाहुणे/अभ्यागतांकडे पब्लिक गॅलरी पासच्या अर्जासोबत त्यांचा योग्य पत्ता, फोन नंबर आणि आधार कार्डची प्रत सादर करावी असा आग्रह धरण्याचा सल्ला देण्यात आला आहे. अर्थसंकल्पीय अधिवेशनाच्या पाससाठी अभ्यागत ३१ जानेवारीला दुपारी ४ वाजेपर्यंत अर्ज करू शकतात. एवढेच नाही तर त्या दिवसासाठी व्हिजिटर गॅलरीसाटी खासदारांना फक्त एकाच पाससाठी अर्ज करण्यास सांगण्यात आले आहे. यामध्ये खासदारांच्या जोडीदारालाही प्राधान्य दिले जाणार आहे.