Petrol Price
जन्म-मृत्यू प्रमाणपत्रांच्या विलंबाविरोधात भूमिपुत्र ब्रिगेडचा नगर परिषदेला इशारा
विदर्भ न्यूज एक्सप्रेस
तालुका प्रतिनिधी / बल्लारपूर : बल्लारपूर नगर परिषदेमध्ये जन्म व मृत्यू प्रमाणपत्रांच्या कामकाजात होत असलेली कथित अनियमितता, नागरिकांना पावती न देणे तसेच विविध प्रशासकीय प्रकरणे दीर्घकाळ प्रलंबित ठेवण्याच्या प्रकाराविरोधात भूमिपुत्र ब्रिगेड बल्लारपूरच्या वतीने नगर परिषद प्रशासनाला निवेदन देण्यात आले. नागरिकांच्या समस्यांकडे तातडीने लक्ष न दिल्यास नगर परिषदेचा तीव्र घेराव करून आंदोलन करण्याचा इशारा संघटनेने दिला आहे.
जन्म व मृत्यू प्रमाणपत्रांमध्ये दुरुस्ती करताना जन्म-मृत्यू नोंदणी अधिनियम, १९६९ मधील तरतुदींचे पालन करण्यात यावे, अशी मागणी भूमिपुत्र ब्रिगेडने केली आहे. या प्रक्रियेसाठी अन्य कोणता शासन निर्णय अथवा नियम लागू केला जात असल्यास त्याची स्पष्ट माहिती नागरिकांसमोर जाहीर करावी, अशीही मागणी करण्यात आली. जन्म-मृत्यू प्रमाणपत्रांच्या कामात विनाकारण विलंब होत असल्याचा आरोप संघटनेने केला आहे. नागरिकांकडून शुल्क घेतल्यानंतरही त्यांना पेमेंटची पावती अथवा रीतसर पावती दिली जात नसल्याने प्रशासनाच्या कामकाजावर प्रश्नचिन्ह निर्माण झाले असल्याचे निवेदनात नमूद करण्यात आले आहे.
दरम्यान, नगर परिषदेच्या कर विभागातील फेरफार प्रकरणेही मागील सात ते आठ महिन्यांपासून प्रलंबित असल्याचा आरोप करण्यात आला. या प्रकरणांमुळे नागरिकांना मानसिक तसेच आर्थिक त्रास सहन करावा लागत असून, प्रलंबित प्रकरणांचा तातडीने निपटारा करण्याची मागणी करण्यात आली. नगर परिषद प्रशासनाने नागरिकांच्या तक्रारींची गांभीर्याने दखल घेऊन जन्म-मृत्यू प्रमाणपत्रांच्या कामकाजातील विलंब दूर करावा, प्रलंबित फेरफार प्रकरणे तातडीने निकाली काढावीत तसेच दोषी अधिकारी-कर्मचाऱ्यांवर योग्य ती कारवाई करावी, अशी मागणी भूमिपुत्र ब्रिगेडने केली आहे.
मागण्यांची तातडीने पूर्तता न झाल्यास नगर परिषदेला घेराव घालून तीव्र आंदोलन करण्यात येईल. तसेच शासनाच्या वरिष्ठ स्तरावर अधिकृत तक्रार दाखल करण्यात येईल, असा इशारा संघटनेने दिला आहे. निवेदन देताना भूमिपुत्र ब्रिगेड बल्लारपूरचे अध्यक्ष ताहेर हुसैन यांच्यासह अमोल वर्मा, साजिद शेख, महमूद भाई, संजय दुबे, सैयद अजीज अब्दुल आबिद, अल्विना शेख, संजय बोंबले, किशोर नगराळे, बशीर खान, विजय ढोके, इम्तियाज सय्यद, इमरान खान, शकील खान, शाहिद शेख, रवि मेश्राम, यासिर खान, अतीक शेख, गौस शेख, श्रीकांत यांच्यासह अन्य पदाधिकारी व नागरिक उपस्थित होते.
