महत्वाच्या बातम्या

मणिपूर येथील आदिवासी महिलांवर होणाऱ्या अत्याचार विरुद्ध निवेदनामार्फत निषेध

विदर्भ न्यूज एक्सप्रेस

प्रतिनिधी / गडचिरोली : महाराष्ट्र ट्रायबल आघाडी जिल्हा अध्यक्ष गडचिरोली कविता उईके यांच्या नेतृत्वाखाली मणिपूर येथील आदिवासी महिलांवर होणाऱ्या अत्याचारविरुद्ध निषेध करून जिल्हाधिकारी गडचिरोली मार्फत राष्ट्रपती यांना २६ जुलै २०२३ ला निवेदन सादर करण्यात आले.

या निवेदनामार्फत राष्ट्रपती यांना आवाहन करण्यात आले की, त्यांनी एक महिला म्हणून, आदिवासी समाजाची प्रतिनिधी म्हणून, आदिवासींच्या हक्कांची संरक्षक आणि भारतीय संविधानाच्या अंतर्गत सर्वोच्च पदाची धारक म्हणून या गंभीर त्रासदायक परिस्थितित त्वरित हस्तक्षेप करण्यात यावा आणि मणिपूरला भेट देऊन पीडित लोकांशी विशेषत: अत्याचार पीडित महिलांशी संवाद साधावा व आवश्यक आश्वासन द्यावे.

मणिपूरच्या स्त्रियांना विशेषत: कुकी- झो आदिवासी समुदायातील महिलांना आधाराची गरज आहे. जी फक्त आपण देऊ शकता. हिंसाचाराच्या सर्व कृत्यांची सर्व समावेशक आणि कालबद्ध न्यायालयीन चौकशीची मागणी करावी. जेणेकरून एस.सी. आणि एस.टी. (पीओए) कायद्याअंतर्गत त्वरित खटला आणि दोषी ठरविण्यासह, गंभीर गुन्हे केलेल्या सर्व आरोपींना अटक केली जाईल. अशाप्रकारे निवेदन देऊन निषेध व्यक्त करण्यात आला.

या प्रसंगी महाराष्ट्र ट्रायबल आघाडी जिल्हा अध्यक्ष गडचिरोली प्रा. कविता उईके, प्रा. प्रज्ञा वनमाली महिलाकक्ष अध्यक्ष, कादंबरी केदार सदस्य, महाराष्ट्र ट्रायबल आघाडीचे सदस्य प्रमोद सयाम, सुरज भोयर प्रामुख्याने उपस्थित होते.