Petrol Price
गणेशोत्सवात आरोग्य जनजागृतीचा जागर : ७१८ शिबिरांत ५७ हजार १७८ नागरिकांची तपासणी
- श्री गणेशा आरोग्याचा अभियानांतर्गत आरोग्य तपासणीसोबत शासकीय वैद्यकीय योजनांची माहिती
विदर्भ न्यूज एक्सप्रेस
प्रतिनिधी / भंडारा : गणेशोत्सवाच्या उत्साहात नागरिकांच्या आरोग्यालाही प्राधान्य देत मुख्यमंत्री वैद्यकीय सहाय्यता कक्ष आणि आरोग्य विभागाच्या वतीने राबविण्यात येत असलेल्या श्री गणेशा आरोग्याचा या विशेष अभियानाला भंडारा जिल्ह्यात उत्स्फूर्त प्रतिसाद मिळत आहे. या अभियानांतर्गत १५ ते १९ सप्टेंबरदरम्यान जिल्ह्यात ७१८ आरोग्य शिबिरांचे आयोजन करण्यात आले. या शिबिरांमध्ये तब्बल ५७ हजार १७८ नागरिकांची आरोग्य तपासणी करण्यात आली. मुख्यमंत्री वैद्यकीय सहाय्यता कक्षाचे नचिकेत बांडेबुचे यांनी ही माहिती दिली.
गणेशोत्सव हा मोठ्या प्रमाणावर नागरिकांचा सहभाग असलेला सार्वजनिक उत्सव आहे. या उत्सवाच्या माध्यमातून नागरिकांमध्ये आरोग्यविषयक जनजागृती निर्माण करण्याच्या उद्देशाने श्री गणेशा आरोग्याचा अभियान राबविण्यात येत आहे. जिल्ह्यातील विविध गणेश मंडळांच्या परिसरात आरोग्य शिबिरे घेण्यात आली. या शिबिरांमध्ये नागरिकांची आरोग्य तपासणी करण्याबरोबरच त्यांच्या आरोग्यविषयक समस्यांबाबत आवश्यक वैद्यकीय मार्गदर्शन करण्यात आले.
आरोग्य तपासणीसोबत योजनांची माहिती -
या अभियानाच्या माध्यमातून नागरिकांना केवळ आरोग्य तपासणीची सुविधा उपलब्ध करून देण्यात येत नसून विविध शासकीय आरोग्य योजना, वैद्यकीय सहाय्याच्या सुविधा आणि उपलब्ध उपचारांबाबतही माहिती देण्यात येत आहे. गंभीर आजारांवरील उपचारासाठी आर्थिक मदतीची आवश्यकता असलेल्या पात्र रुग्णांना मुख्यमंत्री वैद्यकीय सहाय्यता निधी योजनेतून उपलब्ध होणाऱ्या मदतीची प्रक्रिया आणि सुविधांबाबत मार्गदर्शन केले जात आहे. त्यामुळे उपचारासाठी आर्थिक अडचणींचा सामना करणाऱ्या पात्र रुग्णांना उपलब्ध असलेल्या वैद्यकीय आर्थिक सहाय्याच्या पर्यायांची माहिती मिळत आहे.
यासोबतच धर्मादाय रुग्णालय मदत कक्षाबाबतही नागरिकांना मार्गदर्शन करण्यात येत आहे. धर्मादाय रुग्णालयांमध्ये उपलब्ध असलेल्या उपचार सुविधांचा पात्र आणि गरजू रुग्णांनी लाभ घ्यावा, यासाठी आवश्यक माहिती अभियानाच्या माध्यमातून दिली जात आहे.
भक्तीसोबत आरोग्याचीही काळजी -
गणेशोत्सवाच्या माध्यमातून भक्तीसोबतच आरोग्याची काळजी घेण्याचा संदेश नागरिकांपर्यंत पोहोचविणे, हा श्री गणेशा आरोग्याचा अभियानाचा प्रमुख उद्देश आहे. सार्वजनिक गणेशोत्सवाच्या व्यासपीठाचा उपयोग आरोग्यविषयक जनजागृतीसाठी करून नागरिकांना नियमित आरोग्य तपासणी, उपलब्ध वैद्यकीय सुविधा आणि शासकीय योजनांची माहिती देण्यावर भर देण्यात येत आहे. आरोग्य तपासणीसोबतच नागरिकांना विविध शासकीय आरोग्य योजना, वैद्यकीय सहाय्य आणि उपलब्ध उपचार सुविधांची माहिती मिळत असल्याने आरोग्यविषयक जागरूकता निर्माण करण्याच्या दृष्टीने या अभियानाला महत्त्व प्राप्त झाले आहे.
गरजू रुग्णांनी उपलब्ध सुविधांचा लाभ घ्यावा -
जिल्ह्यातील नागरिकांनी श्री गणेशा आरोग्याचा अभियानांतर्गत आयोजित करण्यात येणाऱ्या आरोग्य शिबिरांचा लाभ घ्यावा. तसेच गंभीर आजारांवरील उपचारासाठी आर्थिक मदतीची आवश्यकता असलेल्या गरजू आणि पात्र रुग्णांनी मुख्यमंत्री वैद्यकीय सहाय्यता निधी तसेच धर्मादाय रुग्णालय मदत कक्षाच्या सुविधांचा लाभ घेण्यासाठी संबंधित यंत्रणेशी संपर्क साधावा, असे आवाहन मुख्यमंत्री वैद्यकीय सहाय्यता कक्षाचे नचिकेत बांडेबुचे यांनी केले आहे.
गणेशोत्सवाच्या सार्वजनिक उत्सवाला आरोग्य जनजागृतीची जोड देत राबविण्यात येत असलेल्या या अभियानामुळे जिल्ह्यात मोठ्या संख्येने नागरिकांपर्यंत आरोग्य तपासणी आणि वैद्यकीय सहाय्याच्या सुविधांची माहिती पोहोचत आहे.
