वीजा पडण्याची इशारा देणारे दामिनी अँप आपल्या मोबाईल मध्ये असायलाचं हवे


विदर्भ न्यूज एक्सप्रेस 
प्रतिनिधी / भंडारा :
मान्सूनपूर्व आणि मान्सूनच्या सुरुवातीच्या कालखंडात विशेषतः माहे मे, जुन व जुलै तसेच मान्सून पश्चात साधारणतः माहे ऑक्टोबर या महिन्यात राज्यात अनेक ठिकाणी विजेच्या कडकडाटांसह पूर्वमोसमी पाऊस हजेरी लावतो. मान्सून दाखल झाल्यावर साधारणतः पहिल्या पावसात शहरी भागाबरोबरच विशेष करुन ग्रामीण भागात वीज कोसळून अनेक शेतकरी व नागरिकांना आपला जीव गमवावा लागतो. भंडारा जिल्ह्यात ही वीज पडून दुर्घटना होत असतात. वीज पडण्याच्या घटनेतील जीवित हानी कमी करण्यासाठी किंबहुना टाळण्यासाठी काही ठोस उपाययोजना सुरु आहेतच तथापि यावरचा एक उपाय म्हणजे पृथ्वी विज्ञान मंत्रालय भारत सरकार नवी दिल्ली वादळी पाऊस, विजांच्या कडकडाटाचा अचूक अंदाजाची पूर्वसूचना नागरिकांना मिळावी, याकरिता दामिनी अँप विकसित केले आहे. या अँपच्या माध्यमातून वादळी पाऊस, विजांच्या कडकडाटाचे त्यांच्या परिसरातील अचूक अंदाज पंधरा मिनिटे ते अर्धा तास आधी नागरिकांना घरबसल्या मिळणार आहेत. त्यामुळे वादळी वाऱ्यांसह येणारा पाऊस आणि वीज पडल्यामुळे होणारी नागरिकांची जीवितहानी टाळणे शक्य होणार आहे. मान्सून दाखल झाल्यावर साधारणतः पहिल्या पावसात शहरी भागाबरोबरच विशेष करुन ग्रामीण भागात वीज कोसळून अनेक नागरिकांना आपला जीव गमवावा लागतो. यामध्ये विशेषतः शेतकरी व शेत मजुरांची संख्या अधिक आहे. विजांसह होणाऱ्या पावसाचे पूर्वानुमान शेतकऱ्यांना व नागरिकांना काही वेळ अगोदर समजावे, यासाठी सदर दामिनी अँप उपयोगी ठरत आहे. पुण्यातील भारतीय उष्णप्रदेशीय हवामान संशोधन संस्था (आयआयटीएम ) या संस्थेने हे अँप विकसित केले आहे.दामिनी अँपसाठी आयआयटीएमने लाइटनिंग लोकेशन नेटवर्क हे मॉडेल विकसित केले आहे. माहिती संकलनासाठी विविध भागात सेन्सर बसविण्यात आले आहेत. या अँपमुळे शेतकरी, नागरिकांना वादळी पाऊस, विजांच्या कडकडाटाचे पंधरा मिनिट ते अर्धा तास आधी अचूक अंदाज मिळू शकतो. सदरचे अँप GPS लोकेशन ने काम करीत असून विज पडण्याच्या 15 मिनिटापुर्वी सदरच्या ॲपमध्ये प्रभावित होण्याची शक्यता असलेल्या क्षेत्राची दिशादर्शक स्थिती दर्शविण्यात येते. विजा पडण्याची शक्यता तसेच वीज म्हणजे नेमके काय, वीज कोसळणे याची शास्त्रीय माहिती आणि विजेपासून वाचण्यासाठी नागरिकांनी काय करायला पाहिजे, याचीही सविस्तर सचित्र माहिती दामिनी अँपमध्ये देण्यात आली आहे. या अँपवर लोकेशन टाकल्यानंतर संबंधित भागात वादळी वारे अथवा विजेच्या गडगडांची शक्यता असल्यास ती माहिती बघायला मिळत असते, त्यामुळे या माहितीचा आधारावर शेतकरी व नागरिक वेळीच सावध होऊन त्यांच्या जीव वाचवू शकतात. जिल्ह्यातील शेतकऱ्यांनी आणि नागरिकांनी हे अँप डाऊनलोड करुन त्याचा वापर करण्याबाबत, तसेच स्थानिक पातळीवर गावस्तरीय कर्मचारी, तलाठी, ग्रामसेवक, कृषी सहायक, शिक्षक, स्थानिक लोकप्रतिनिधी यांनी सामान्य नागरीक / शेतकरी यांना हे ॲप डाऊनलोड करण्यास प्रवृत्त करावे असे आवाहन जिल्हा आपत्ती व्यवस्थापन प्राधिकरणा तर्फे करण्यात आले आहे.
दामिनी अँप कसे फोन मध्ये घ्यावे
गुगल प्ले स्टोर मध्ये जाऊन दामिनी टाईप केल्यानंतर हे अँप येईल ते आपल्या फोन मध्ये डाऊनलोड करून घ्या ते आपल्या सुरक्षिततेसाठी मोठी भूमिका बजावू शकतं.. अधिक सतर्क राहण्यासाठी हे अँप आपल्याकडे असाव. हा मोबाईल अँप आजच डाऊनलोड करून घ्या.



  Print






News - Bhandara | Posted : 2022-05-27




Related Photos