Petrol Price
३५ लाखांचे इनामी तीन माओवादी शरण : ८१ गुन्ह्यांचा इतिहास
- रामप्रसाद, पत्नी मीता आणि महिला कॅडर गौरीचा शस्त्रत्याग; एके-४७ रायफल पोलिसांच्या स्वाधीन
विदर्भ न्यूज एक्सप्रेस
प्रतिनिधी / गडचिरोली : झारखंड-पश्चिम बंगाल सीमेवरील जंगलात दीर्घकाळ माओवादी चळवळीत सक्रिय असलेल्या तीन जहाल इनामी माओवाद्यांनी १० सप्टेंबर रोजी पश्चिम बंगाल पोलिसांसमोर आत्मसमर्पण केले. यामध्ये भाकपा (माओवादी)चा रिजनल कमिटी सदस्य रामप्रसाद मार्डी ऊर्फ सचिन, त्याची पत्नी तथा झोनल कमिटी सदस्य मीता ऊर्फ नयनतारा ऊर्फ झुम्पा आणि महिला कॅडर बुलू ऊर्फ गौरी यांचा समावेश आहे.
पोलिसांच्या माहितीनुसार, या तिघांविरुद्ध झारखंडमध्ये विविध गंभीर स्वरूपाचे एकूण ८१ गुन्हे दाखल आहेत. त्यांच्यावर मिळून तब्बल ३५ लाख रुपयांचे इनाम जाहीर करण्यात आले होते. सुरक्षा दलांकडून माओवादीविरोधी आक्रमक मोहिमा आणि आत्मसमर्पणासाठी प्रयत्न सुरू असतानाच तिघांनी शस्त्रत्याग केला.
रामप्रसादविरुद्ध ४४ गुन्हे -
पूर्व सिंहभूम जिल्ह्यातील पटमदा परिसरात सक्रिय असलेला रामप्रसाद मार्डी हा भाकपा (माओवादी) संघटनेत रिजनल कमिटी सदस्य म्हणून कार्यरत होता. त्याच्याविरुद्ध ४४ गुन्हे दाखल असल्याची माहिती पोलिसांनी दिली. आत्मसमर्पण करताना रामप्रसादने आपल्याकडील एके-४७ रायफल पोलिसांच्या स्वाधीन केली. विशेष म्हणजे, आत्मसमर्पण केलेला माओवादी नेता मल्लोजुला वेणुगोपाल राव ऊर्फ भूपती याचा रामप्रसाद भाऊ असल्याची माहिती समोर आली आहे.
किशनजीच्या अंगरक्षकांच्या गटात मीता -
रामप्रसादची पत्नी मीता ऊर्फ नयनतारा ऊर्फ झुम्पा ही माओवादी संघटनेच्या झोनल कमिटीची सदस्य होती. तिच्यावर १९ गुन्हे दाखल आहेत. माओवादी चळवळीतील कुख्यात नेता किशनजीच्या काळात मीता त्याच्या अंगरक्षकांच्या गटात कार्यरत होती. लालगड मोहिमेदरम्यान किशनजीच्या आसपास तैनात असलेल्या सशस्त्र महिला कॅडरमध्येही तिचा समावेश होता. २४ नोव्हेंबर २०११ रोजी पश्चिम बंगालमधील पश्चिम मेदिनीपूर जिल्ह्यात सुरक्षा दलांसोबत झालेल्या चकमकीत किशनजी ठार झाला होता. त्यानंतरही माओवादी संघटनेतील सक्रिय सहभागामुळे मीता सुरक्षा यंत्रणांच्या रडारवर होती.
हिंसक कारवायांमध्ये सहभाग -
मीता हिच्याविरुद्ध सुरक्षा दलांवरील हल्ले, आयईडी स्फोट आणि अन्य हिंसक घटनांशी संबंधित गुन्हे नोंद आहेत. २०२३ मधील टॉटो परिसरातील तुम्बाहाका जंगलातील आयईडी हल्ल्याशीही तिचे नाव पोलिस रेकॉर्डमध्ये जोडले गेले आहे. दीर्घकाळ माओवादी संघटनेत सक्रिय राहिलेल्या मीताचे आत्मसमर्पण हे सुरक्षा यंत्रणांसाठी महत्त्वाचे मानले जात आहे.
गौरीही होती सुरक्षा यंत्रणांसाठी घातक -
बुलू ऊर्फ गौरी ही माओवादी संघटनेतील सक्रिय कॅडर होती. तिच्याविरुद्ध १८ गुन्हे दाखल आहेत. आयईडी स्फोट, हत्या, हत्येचा प्रयत्न, शस्त्रास्त्र व स्फोटक कायदा तसेच यूएपीएअंतर्गत गुन्ह्यांचा त्यात समावेश आहे. माओवादी कारवायांमध्ये सक्रिय सहभाग असल्याने गौरी सुरक्षा यंत्रणांसाठी घातक कॅडर म्हणून ओळखली जात होती. तिच्या आत्मसमर्पणामुळे माओवादी संघटनेच्या स्थानिक हालचालींवर परिणाम होण्याची शक्यता व्यक्त केली जात आहे.
माओवादीविरोधी मोहिमेला महत्त्वाचे यश -
झारखंड-पश्चिम बंगाल सीमेवरील जंगल परिसरात माओवादी कारवायांविरोधात सुरक्षा दलांकडून सध्या आक्रमक मोहिमा सुरू आहेत. त्याचबरोबर सक्रिय माओवादी कॅडरना मुख्य प्रवाहात आणण्यासाठी आत्मसमर्पणाची प्रक्रियाही राबविण्यात येत आहे. याच पार्श्वभूमीवर एकाच वेळी तीन इनामी माओवाद्यांनी शस्त्रत्याग केल्याने सुरक्षा यंत्रणांना महत्त्वाचे यश मिळाले आहे. विशेष म्हणजे, या तिघांवर मिळून ३५ लाख रुपयांचे इनाम आणि तब्बल ८१ गुन्ह्यांची नोंद असल्याने त्यांचे आत्मसमर्पण माओवादीविरोधी मोहिमेच्या दृष्टीने विशेष महत्त्वाचे मानले जात आहे.
