Petrol Price
दारू विक्रेत्यांची मुजोरी वाढली : संतप्त महिलांची थेट पोलिस ठाण्यावर धडक!
- वारंवार तक्रारी करूनही कारवाई होत नसल्याने महिलांचा आक्रमक पवित्रा; युवती सेनेच्या नेतृत्वात शेकडो महिलांनी पुराडा पोलिसांना घातला घेराव
विदर्भ न्यूज एक्सप्रेस
तालुका प्रतिनिधी / कुरखेडा : तालुक्यातील दादापूर, रामगड, जामटोला आणि वागदारा या गावांमध्ये अवैध दारूविक्रीचा धंदा दिवसेंदिवस वाढत असल्याने संतप्त महिलांनी आता आक्रमक भूमिका घेतली आहे. गावागावांत सुरू असलेल्या दारूविक्रीमुळे तरुण पिढी व्यसनाधीनतेच्या विळख्यात अडकत असून अनेक कुटुंबांचे संसार उद्ध्वस्त होत आहेत. दारूच्या नशेत घराघरांत भांडण-तंटे, कौटुंबिक कलह आणि अशांततेचे वातावरण निर्माण होत असल्याने महिलांमध्ये तीव्र संताप व्यक्त केला जात आहे. वारंवार निवेदने देऊनही अवैध दारूविक्रीवर ठोस कारवाई होत नसल्याने अखेर युवती सेनेच्या नेतृत्वाखाली शेकडो महिलांनी २७ तारखेला थेट पुराडा पोलिस ठाण्यावर धडक देत प्रशासनाचे लक्ष वेधले.
दारूविक्रीमुळे गावांतील वातावरण दूषित -
दादापूर, रामगड, जामटोला आणि वागदारा या गावांमध्ये अवैध दारूविक्री खुलेआम सुरू असल्याचा महिलांचा आरोप आहे. या दारूविक्रीमुळे गावातील तरुण मोठ्या प्रमाणात व्यसनाच्या आहारी जात असून त्यांच्या भविष्यावर गंभीर परिणाम होत आहेत. अनेक कुटुंबांमध्ये दारूच्या कारणावरून वादविवाद होत असून महिलांना मानसिक आणि कौटुंबिक त्रास सहन करावा लागत आहे. गावातील सामाजिक वातावरणही बिघडत चालल्याने महिलांनी यापूर्वीही संबंधित यंत्रणांकडे तक्रारी आणि निवेदने दिली होती. मात्र, त्यानंतरही परिस्थितीत अपेक्षित सुधारणा झाली नसल्याने महिलांचा संताप अनावर झाला.
युवती सेनेच्या नेतृत्वात महिलांची पोलिस ठाण्यावर धडक -
अवैध दारूविक्रीला आळा घालण्यासाठी युवती सेना जिल्हाध्यक्ष प्रा. उमा चंदेल यांच्या नेतृत्वाखाली दादापूर, जामटोला, वागदारा आणि रामगड येथील शेकडो महिला एकत्र आल्या. २७ तारखेला त्यांनी थेट पुराडा पोलिस ठाणे गाठून प्रशासनासमोर आपली व्यथा मांडली. यावेळी महिलांनी ठाणेदार रवींद्र म्हैसकर यांची भेट घेऊन संबंधित गावांमध्ये सुरू असलेल्या अवैध दारूविक्रीची माहिती दिली. तसेच या व्यवसायामुळे निर्माण झालेल्या सामाजिक आणि कौटुंबिक समस्यांकडे पोलिसांचे लक्ष वेधले.
दारूविक्रेत्यांवर कठोर कारवाई करण्याची मागणी -
गावातील अवैध दारूविक्री तातडीने बंद करण्यात यावी, संबंधित दारूविक्रेत्यांवर कठोर कायदेशीर कारवाई करावी आणि यापुढे अशा प्रकारांना आळा घालण्यासाठी पोलिसांनी नियमित गस्त व प्रभावी उपाययोजना कराव्यात, अशी मागणी महिलांनी केली. केवळ निवेदने स्वीकारून चालणार नाही, तर प्रत्यक्ष कारवाई करून गावांना दारूमुक्त करण्यासाठी प्रशासनाने पुढाकार घ्यावा, अशी भूमिका महिलांनी मांडली. या आंदोलनात युवती सेना जिल्हाध्यक्ष प्रा. उमा चंदेल यांच्यासह मीना उसेंडी, लता बोरकर, अंतकला मेश्राम, लता दखणे, शांता मडावी आदी महिला उपस्थित होत्या.
महिलांचा आक्रमक पवित्रा; पोलिसांच्या कारवाईकडे लक्ष -
दारूविक्रीमुळे अनेक कुटुंबांचे संसार विस्कळीत होत असताना महिलांनी एकजुटीने पुढाकार घेत पोलिस ठाण्यावर धडक देणे, ही प्रशासनासाठी गंभीर बाब मानली जात आहे. गावांमधील अवैध दारूविक्रीला आळा घालून महिलांना सुरक्षित आणि शांततापूर्ण वातावरण मिळवून देण्याची जबाबदारी पोलिस प्रशासनाची आहे. त्यामुळे महिलांच्या या तक्रारींची दखल घेऊन पुराडा पोलिस आता संबंधित दारूविक्रेत्यांविरोधात कोणती ठोस कारवाई करतात, याकडे परिसरातील नागरिकांचे लक्ष लागले आहे.
