Petrol Price
१७ महिन्यांनंतर वडिलांच्या खुनाचा उलगडा : मुलानेच गळा आवळून केली हत्या, विषप्राशनाचा रचला बनाव, आरोपी अटकेत
विदर्भ न्यूज एक्सप्रेस
प्रतिनिधी / चंद्रपूर : कौटुंबिक वादातून जन्मदात्या वडिलांचाच गळा आवळून खून केल्यानंतर विषप्राशनामुळे मृत्यू झाल्याचा बनाव रचल्याची धक्कादायक घटना राजुरा तालुक्यातील धिडसी येथे उघडकीस आली आहे. वडिलांची हत्या करून त्यांच्या तोंडाला तणनाशक औषध लावून मृत्यूचे कारण लपविण्याचा प्रयत्न मुलाने केला होता. मात्र, व्हिसेरा तपासणी अहवाल आणि वैद्यकीय अभिप्रायामुळे या प्रकरणाचा उलगडा झाला. याप्रकरणी आरोपी मुलगा निखील शंकर काळे ३१ वर्ष , रा. धिडसी याला राजुरा पोलिसांनी अटक केली आहे.
मृतक शंकर परशुराम काळे ५९ वर्ष हे १९ मे २०२५ रोजी रात्री जागल करण्यासाठी चार्ली येथील स्वतःच्या शेतात गेले होते. त्याच दिवशी सायंकाळी घरातील सोन्याची गोप चोरी केल्याचा आरोप आई मंदा काळे यांनी मुलगा निखील याच्यावर केला होता. यावरून निखील आणि त्याच्या वडिलांमध्ये जोरदार वाद होऊन मारहाण झाली. या घटनेचा राग निखीलच्या मनात कायम होता. रात्री १० वाजताच्या सुमारास वडील शेतात गेल्यानंतर निखील ट्रॅक्टर चालविण्यासाठी घराबाहेर पडला. मात्र, वडिलांनी केलेल्या मारहाणीचा राग मनात धरून तो मध्यरात्री सुमारे १ वाजता पुन्हा शेतात पोहोचला. त्यावेळी वडील बाजेवर झोपलेले होते. पुन्हा दोघांमध्ये वाद होऊन मारहाण सुरू झाली. याचवेळी निखीलने वडिलांना बाजेवर पाडून दोन्ही हातांनी त्यांचा गळा जोरात दाबला. काही वेळातच वडिलांची हालचाल बंद झाली आणि त्यांचा मृत्यू झाला.
वडिलांचा मृत्यू झाल्यानंतर आरोपीने मृतदेह सुबाभळीच्या झाडाजवळील शेताच्या धुऱ्यावर नेऊन ठेवला. त्यानंतर शेतात असलेल्या फवारणीच्या तणनाशक औषधातील द्रव वडिलांच्या तोंडाला लावले. औषधाची बाटली काही अंतरावर ठेवून विषप्राशनामुळे मृत्यू झाल्याचा बनाव रचत तो घरी परतला. २० मे २०२५ रोजी दुपारी निखीलने वडील शेतात मृतावस्थेत असल्याची माहिती दिली. घटनास्थळी तणनाशक औषधाची बाटली आढळल्याने सुरुवातीला विषप्राशनामुळे मृत्यू झाल्याचा संशय व्यक्त करण्यात आला. त्यानुसार राजुरा पोलीस ठाण्यात अकस्मात मृत्यू क्रमांक ४४/२०२५ अन्वये नोंद करण्यात आली होती.
या प्रकरणाच्या तपासादरम्यान पोलिसांनी घटनास्थळावरून Garud नाव असलेली तणनाशक औषधाची बाटली जप्त केली होती. मृतदेहाचे शवविच्छेदन करून व्हिसेरा नमुने रासायनिक विश्लेषणासाठी पाठविण्यात आले. ७ मार्च २०२६ रोजी प्राप्त झालेल्या अहवालात मृतदेहाच्या नमुन्यांमध्ये कोणत्याही प्रकारचे विष आढळून आले नसल्याचे स्पष्ट झाले. त्यानंतर २७ ऑक्टोबर २०२६ रोजी उपजिल्हा रुग्णालय, राजुरा येथील वैद्यकीय अधिकाऱ्यांकडून शवविच्छेदन व व्हिसेरा अहवालाबाबत अभिप्राय घेण्यात आला. वैद्यकीय अभिप्रायात गळ्याच्या हाडाला झालेल्या फ्रॅक्चरचा निष्कर्ष नोंदविण्यात आला. या अहवालामुळे मृत्यूच्या कारणाबाबत संशय निर्माण झाला. पोलिसांनी मुलगा निखील याची सखोल चौकशी केली असता त्याने वडिलांचा गळा आवळून खून केल्याची कबुली दिल्याचे पोलिसांनी सांगितले.
कौटुंबिक वादातून जन्मदात्या वडिलांचाच जीव घेऊन त्यानंतर मृत्यूचे खरे कारण लपविण्यासाठी विषप्राशनाचा बनाव रचल्याचे तपासात उघड झाले. या प्रकरणी आरोपी निखील शंकर काळे याच्याविरुद्ध भारतीय न्याय संहिता कलम १०३(१) व २४० अन्वये गुन्हा दाखल करून त्याला अटक करण्यात आली आहे. राजुरा पोलीस ठाण्याचे प्रभारी पोलीस निरीक्षक नितीन चिंचोळकर यांच्या मार्गदर्शनाखाली या प्रकरणाचा उलगडा करण्यात आला. तब्बल वर्षभरानंतर वैद्यकीय अहवाल आणि पोलिसांच्या तपासातून समोर आलेल्या या घटनेने धिडसी परिसरात खळबळ उडाली आहे.
