Petrol Price
काँग्रेसचे ज्येष्ठ नेते रामचंद्र पा. गहाणे यांचे निधन
- रत्नापूर परिसरावर शोककळा; रविवारी अंत्यसंस्कार
विदर्भ न्यूज एक्सप्रेस
तालुका प्रतिनिधी / सिंदेवाही : काँग्रेसचे ज्येष्ठ नेते, रत्नापूरचे माजी सरपंच तथा कृषी उत्पन्न बाजार समिती, सिंदेवाहीचे माजी सभापती रामचंद्र पा. गहाणे यांचे शनिवारला १४ नोहेबर रोजी निधन झाले. त्यांच्या निधनाने रत्नापूरसह सिंदेवाही तालुक्यात शोककळा पसरली आहे. राजकीय, सामाजिक आणि सहकार क्षेत्रातील एक ज्येष्ठ नेतृत्व हरपल्याची भावना नागरिकांमधून व्यक्त होत आहे.
रामचंद्र पा. गहाणे यांनी आपल्या राजकीय आणि सामाजिक वाटचालीत रत्नापूर गावाच्या विकासासाठी महत्त्वपूर्ण भूमिका बजावली. ग्रामपंचायतीचे सरपंच म्हणून काम करताना त्यांनी गावाच्या स्थानिक प्रश्नांना प्राधान्य देत विकासकामांसाठी पुढाकार घेतला. गावातील नागरिकांशी असलेला त्यांचा जिव्हाळा आणि सार्वजनिक जीवनातील सक्रिय सहभाग यामुळे त्यांनी परिसरात स्वतःची वेगळी ओळख निर्माण केली होती.
काँग्रेस पक्षाचे ज्येष्ठ नेते म्हणून त्यांनी पक्ष संघटनेतही महत्त्वपूर्ण योगदान दिले. कृषी उत्पन्न बाजार समिती, सिंदेवाहीचे सभापती म्हणून जबाबदारी सांभाळताना शेतकरी आणि कृषी क्षेत्राशी संबंधित प्रश्नांशी त्यांचा जवळचा संबंध राहिला. राजकीय अनुभव, नेतृत्वगुण आणि सार्वजनिक जीवनातील दीर्घकालीन वाटचाल यामुळे परिसरातील अनेक कार्यकर्त्यांसाठी ते मार्गदर्शक ठरले होते.
त्यांच्या निधनाची वार्ता समजताच रत्नापूर गावासह परिसरातील नागरिक, राजकीय पदाधिकारी, काँग्रेसचे कार्यकर्ते आणि विविध क्षेत्रांतील मान्यवरांनी शोक व्यक्त केला. त्यांच्या निधनाने रत्नापूरच्या सार्वजनिक जीवनातील एका ज्येष्ठ नेतृत्वाची उणीव निर्माण झाली आहे. रामचंद्र पा. गहाणे यांच्यावर रविवारी १५ सकाळी ११ वाजता रत्नापूर स्मशानभूमीत अंत्यसंस्कार करण्यात येणार आहेत. त्यांच्या पश्चात दोन मुले, मुली, सुना, नातवंड आणि मोठा आप्तपरिवार असा परिवार आहे.
