Petrol Price
महाराष्ट्राच्या सर्वांगीण विकासात टाटा कॅपिटलचे सामाजिक उत्तरदायित्व उपक्रम ठरणार महत्त्वपूर्ण : मुख्यमंत्री देवेंद्र फडणवीस
- शिक्षण, आरोग्य, कौशल्य विकास, जलसंधारण आणि पर्यावरण संवर्धनातून साडेपाच लाखांहून अधिक नागरिकांना लाभ; राज्यातील विविध क्षेत्रांत व्यापक काम
विदर्भ न्यूज एक्सप्रेस
वृत्तसंस्था / मुंबई : महाराष्ट्राच्या सर्वांगीण आणि शाश्वत विकासासाठी शासनासोबत उद्योग क्षेत्राचा सक्रिय सहभाग महत्त्वपूर्ण असून, सामाजिक उत्तरदायित्व निधीच्या माध्यमातून राबविण्यात येणारे विविध उपक्रम राज्याच्या विकासाला गती देत आहेत. शिक्षण, आरोग्य, कौशल्य विकास, जलसंधारण, अक्षय ऊर्जा आणि पर्यावरण संवर्धन अशा विविध क्षेत्रांत टाटा कॅपिटलने राबविलेल्या उपक्रमांमुळे राज्यातील आर्थिकदृष्ट्या दुर्बल घटक, वंचित समाज, आदिवासी, महिला आणि युवकांच्या जीवनमानात सकारात्मक बदल घडत असल्याचे मुख्यमंत्री देवेंद्र फडणवीस यांनी सांगितले.
टाटा कॅपिटलच्या सामाजिक उत्तरदायित्व उपक्रमांतर्गत गेल्या पाच वर्षांत महाराष्ट्रातील साडेपाच लाखांहून अधिक नागरिकांना विविध योजनांचा लाभ मिळाला आहे. कंपनीच्या देशभरातील एकूण सामाजिक उत्तरदायित्व खर्चापैकी सुमारे ३० टक्के खर्च महाराष्ट्रात करण्यात आला आहे. देशभरात या उपक्रमांच्या माध्यमातून ३७ लाखांहून अधिक नागरिकांपर्यंत विविध सुविधा आणि सेवा पोहोचविण्यात आल्या आहेत.
शिष्यवृत्ती आणि आधुनिक शिक्षणाला प्रोत्साहन -
आर्थिक परिस्थितीमुळे गुणवंत विद्यार्थ्यांचे शिक्षण अर्धवट राहू नये, या उद्देशाने टाटा कॅपिटलच्या पंख शिष्यवृत्ती उपक्रमांतर्गत महाराष्ट्रातील ६ हजार ४०० हून अधिक विद्यार्थ्यांना शिष्यवृत्ती देण्यात आली आहे. विशेषतः पालघर जिल्ह्यातील आदिवासी मुलींना उच्च शिक्षणाच्या संधी उपलब्ध करून देण्यासाठी प्रयत्न करण्यात येत आहेत.
विद्यार्थ्यांमध्ये आर्थिक व्यवहारांविषयी जागरूकता निर्माण करण्यासाठी राबविण्यात आलेल्या आर्थिक साक्षरता कार्यक्रमांतर्गत शासकीय शाळांमधील ८५ हजारांहून अधिक विद्यार्थ्यांना आर्थिक नियोजन, व्यवहार आणि जबाबदारीने कर्ज घेण्याबाबत मार्गदर्शन करण्यात आले आहे.
तसेच मुंबई आणि ठाणे महानगरपालिका क्षेत्रांतील ५० हजारांहून अधिक विद्यार्थ्यांना कृत्रिम बुद्धिमत्ता (एआय), रोबोटिक्स आणि विज्ञान, तंत्रज्ञान, अभियांत्रिकी व गणित (एसटीईएम) विषयांतील प्रशिक्षण उपलब्ध करून देण्यात येत आहे. यामुळे विद्यार्थ्यांना भविष्यातील तंत्रज्ञानाधारित शिक्षण आणि रोजगाराच्या संधींसाठी तयार करण्यावर भर दिला जात आहे.
कौशल्य विकासातून युवकांना रोजगाराच्या संधी -
युवक, महिला, आदिवासी आणि दिव्यांग व्यक्तींना आर्थिकदृष्ट्या सक्षम करण्यासाठी प्रोअस्पायर हा कौशल्य विकास उपक्रम राबविण्यात येत आहे. या उपक्रमांतर्गत राज्यातील २६ हजारांहून अधिक लाभार्थ्यांना कौशल्य प्रशिक्षण देण्यात आले आहे.
बँकिंग, वित्तीय सेवा, विमा, उद्योजकता आणि विविध व्यावसायिक कौशल्यांचे प्रशिक्षण देऊन युवकांना रोजगारक्षम बनविणे, महिलांना स्वयंरोजगारासाठी प्रोत्साहन देणे आणि वंचित घटकांना आर्थिक स्वावलंबनाच्या संधी उपलब्ध करून देणे, हा या उपक्रमाचा प्रमुख उद्देश आहे.
आरोग्यतारातून दोन लाखांहून अधिक नागरिकांना नेत्रसेवा -
ग्रामीण आणि शहरी भागातील नागरिकांना आरोग्यसेवा उपलब्ध करून देण्याच्या दृष्टीने आरोग्यतारा उपक्रम राबविण्यात येत आहे. या उपक्रमांतर्गत मुंबई, ठाणे आणि पालघर जिल्ह्यांतील दोन लाखांहून अधिक नागरिकांपर्यंत नेत्रसेवा पोहोचविण्यावर भर देण्यात आला आहे.
मोतीबिंदू, काचबिंदू आणि विविध दृष्टिदोषांची तपासणी, आवश्यक उपचार तसेच शस्त्रक्रियांसाठी नामांकित रुग्णालयांच्या सहकार्याने सुविधा उपलब्ध करून देण्यात येत आहेत.
याशिवाय कर्करोग प्रतिबंध, जनजागृती, प्राथमिक तपासणी आणि विशेष उपचारांसंदर्भातील उपक्रमांचा लाभ ३० हजारांहून अधिक नागरिकांना मिळाला आहे. यामध्ये स्तनाचा आणि फुफ्फुसाचा कर्करोग तपासणी कार्यक्रम, गर्भाशयमुखाच्या कर्करोगाबाबत जनजागृती, वैद्यकीय उपकरणांची उपलब्धता आणि उपचारांसाठी आर्थिक सहाय्य यांचा समावेश आहे.
जलआधारमुळे ग्रामीण भागातील जलसुरक्षेला बळ -
ग्रामीण भागातील पाणीटंचाईवर मात करण्यासाठी आणि जलस्रोतांचे पुनरुज्जीवन करण्यासाठी जलआधार उपक्रम राबविण्यात येत आहे. पालघर, अहिल्यानगर आणि सातारा जिल्ह्यांतील ६० हून अधिक गावांमधील एक लाख ३० हजारांपेक्षा अधिक नागरिकांना या उपक्रमाचा लाभ झाला आहे.
या कार्यक्रमांतर्गत ६०० हून अधिक जलस्रोतांचे पुनरुज्जीवन करण्यात आले असून, दरवर्षी ८ हजार ५०० लाख लिटरपेक्षा अधिक पाणीसाठवण क्षमता निर्माण झाल्याचा अंदाज आहे. सातारा जिल्ह्यातील दहा गावांमध्ये सुमारे १० हजार हेक्टर क्षेत्रावर एकात्मिक पाणलोट विकास कार्यक्रम राबविण्यात येत आहे. यामुळे जलसंधारणासोबतच शेतीसाठी पाण्याची उपलब्धता वाढविणे आणि शाश्वत कृषी पद्धतींना प्रोत्साहन देण्याचा प्रयत्न होत आहे.
दुर्गम वस्त्यांमध्ये सौरऊर्जेचा प्रकाश -
वीजपुरवठ्यापासून वंचित असलेल्या दुर्गम भागांतील नागरिकांना ऊर्जा सुविधा उपलब्ध करून देण्यासाठी द ग्रीन स्विच हा उपक्रम राबविण्यात येत आहे. या उपक्रमांतर्गत पालघर, ठाणे आणि रायगड जिल्ह्यांतील १९ दुर्गम वस्त्यांमधील ५८० हून अधिक वीजवंचित घरांपर्यंत सौरऊर्जेवर आधारित वीजपुरवठा पोहोचविण्यात आला आहे. घरगुती वापराबरोबरच पथदिवे आणि सार्वजनिक इमारतींसाठीही सौरऊर्जेची व्यवस्था करण्यात आली आहे.
या प्रकल्पांचे दीर्घकालीन व्यवस्थापन आणि देखभाल प्रभावीपणे व्हावी, यासाठी स्थानिक ग्राम वीज समित्यांच्या सहभागातून व्यवस्था विकसित करण्यात आली आहे. त्यामुळे दुर्गम भागातील नागरिकांना स्वच्छ आणि अक्षय ऊर्जेचा लाभ मिळण्यास मदत होत आहे.
पर्यावरण संवर्धनासाठी ३० हजारांहून अधिक रोपांची लागवड -
शहरी भागातील हरित क्षेत्र वाढविणे आणि जैवविविधतेचे संवर्धन करण्यासाठी वनारोपण फॉर न्यूट्रॅलिटी हा उपक्रम राबविण्यात येत आहे. या उपक्रमांतर्गत ठाण्यातील पारसिक टेकडी परिसरात मियावाकी पद्धतीने ४० हून अधिक प्रकारच्या स्थानिक वृक्षप्रजातींच्या ३० हजारांपेक्षा अधिक रोपांची लागवड करण्यात आली आहे.
मियावाकी पद्धतीमुळे कमी जागेत विविध स्थानिक वृक्षप्रजातींचे घनदाट वनक्षेत्र विकसित करण्यास मदत होते. या उपक्रमातून जैवविविधतेचे संरक्षण, पर्यावरणाचा समतोल राखणे आणि शहरी परिसरातील हरित क्षेत्र वाढविण्याला चालना मिळत आहे.
शासन, उद्योग आणि समाजाच्या सहभागातून शाश्वत महाराष्ट्राची निर्मिती -
शिक्षणातून सक्षम विद्यार्थी, कौशल्य विकासातून रोजगारक्षम युवक, आरोग्यसेवेतून सुदृढ समाज, जलसंधारणातून सक्षम ग्रामीण अर्थव्यवस्था आणि पर्यावरण संवर्धनातून शाश्वत विकास साधण्यासाठी शासन, उद्योग क्षेत्र आणि स्थानिक समुदाय यांचा समन्वय आवश्यक आहे.
टाटा कॅपिटलच्या सामाजिक उत्तरदायित्व निधीतून राबविण्यात येणारे हे विविध उपक्रम केवळ मूलभूत सुविधांची उपलब्धता वाढविणारे नसून, समाजातील वंचित घटकांना विकासाच्या मुख्य प्रवाहात आणण्यासही हातभार लावत आहेत. शिक्षण, आरोग्य, रोजगार, जलसुरक्षा, अक्षय ऊर्जा आणि पर्यावरण या क्षेत्रांतील अशा प्रयत्नांमधून सर्वसमावेशक आणि शाश्वत महाराष्ट्राच्या निर्मितीला बळ मिळत असल्याचे मुख्यमंत्री देवेंद्र फडणवीस यांनी नमूद केले.
