Petrol Price
उद्यापासून कारवाफ्यात बीटस्तरीय क्रीडा स्पर्धांचा थरार!
- आठ आश्रमशाळांतील ५७३ विद्यार्थी उतरणार मैदानात; विविध स्पर्धांसाठी क्रीडांगण सज्ज
विदर्भ न्यूज एक्सप्रेस
प्रतिनिधी / गडचिरोली : एकात्मिक आदिवासी विकास प्रकल्प, गडचिरोली अंतर्गत कारवाफा बीटस्तरीय तीन दिवसीय क्रीडा संमेलनाचे आयोजन १ ते ३ नोव्हेंबर या कालावधीत शासकीय माध्यमिक व उच्च माध्यमिक आश्रमशाळा कारवाफा येथील क्रीडांगणावर करण्यात आले आहे. या क्रीडा संमेलनाच्या माध्यमातून कारवाफा बीटातील पाच शासकीय व तीन अनुदानित अशा एकूण आठ आश्रमशाळांमधील सुमारे ५७३ आदिवासी विद्यार्थ्यांना आपले क्रीडा कौशल्य प्रदर्शित करण्याची संधी मिळणार आहे.
क्रीडा संमेलनाचे उद्घाटन रविवार,१ नोव्हेंबर रोजी सकाळी १० वाजता कारवाफा ग्रामपंचायतीच्या सरपंच महानंदा आतला यांच्या हस्ते होणार आहे. सहउद्घाटक म्हणून शाळा व्यवस्थापन समितीचे अध्यक्ष विठ्ठल सिडाम उपस्थित राहणार आहेत. उद्घाटन कार्यक्रमाच्या अध्यक्षस्थानी सहाय्यक जिल्हाधिकारी तथा प्रकल्प अधिकारी अरुण एम. राहणार आहेत.
प्रमुख अतिथी म्हणून सहाय्यक प्रकल्प अधिकारी वहीद शेख, कनिष्ठ शिक्षण विस्तार अधिकारी एल.के. नरोटे, कारवाफा येथील उपसरपंच विजय बहिरवार, जांभळीचे उपसरपंच पुरुषोत्तम बावणे, पोलीस पाटील चित्रलेखा रायपुरे,पीएसआय किशोर पुंड, वैद्यकीय अधिकारी डॉ. सखा हिचामी, केंद्रप्रमुख प्रीती नवघडे तसेच कारवाफा आश्रमशाळेचे मुख्याध्यापक विष्णू चव्हाण यांच्यासह बीटातील इतर मुख्याध्यापक उपस्थित राहणार आहेत.
या क्रीडा संमेलनात कारवाफा बीटातील कारवाफा, पोटेगाव, गडचिरोली, पेंढरी व गोडलवाही या पाच शासकीय आश्रमशाळा, तर चांदाळा, गट्टा व गिरोला या तीन अनुदानित आश्रमशाळांचा सहभाग राहणार आहे. विविध क्रीडा स्पर्धांच्या माध्यमातून विद्यार्थ्यांना आपली गुणवत्ता, आत्मविश्वास, खिलाडूवृत्ती, शिस्त,कौशल्य आणि सांघिक भावना प्रदर्शित करण्याची संधी उपलब्ध होणार आहे.सांघिक व वैयक्तिक स्पर्धा १९, १७ व १४ वर्षे वयोगटातील विद्यार्थ्यांसाठी आयोजित करण्यात आल्या आहेत.
