महत्वाच्या बातम्या

वॉक फॉर कॉन्स्टिट्युशन संविधान जनजागृती रॅलीला उत्स्फृर्त प्रतिसाद

- नागरीक व विद्यार्थ्यांकडून संविधान प्रास्ताविकाचे वाचन

- सामाजिक न्याय विभागाचे सहायक आयुक्त पी.जी. कुलकर्णी यांच्या हस्ते हिरवी झेंडी दाखवून शुभारंभ

विदर्भ न्यूज एक्सप्रेस

प्रतिनिधी / वर्धा : नागरीक व विद्यार्थ्यांमध्ये संविधानाविषयी जनजागृती निर्माण करण्यासाठी छत्रपती शिवाजी महाराज चौक येथून वॉक फॉर कॉन्स्टिट्युशन संविधान जनजागृती रॅलीचे आयोजन करण्यात आले होते. यावेळी छत्रपती शिवाजी महाराज यांच्या पुतळ्यास पुष्पहार अर्पण व अभिवादन करून सहायक आयुक्त पी.जी. कुलकर्णी यांच्या हस्ते हिरवी झेंडी दाखवून रॅलीचा शुभारंभ करण्यात आला.

याप्रसंगी केंद्रीय संचार ब्युरो, वर्धाचे क्षेत्रीय प्रचार अधिकारी हंसराज राऊत, समाज कल्याणचे विशेष अधिकारी अनिल वाळके, बार्टीचे प्रकल्प अधिकारी दिनेश बारई, कुंभलकर समाजकार्य महाविद्यालयाचे प्राचार्य डॉ. चंदू पोपटकर, अनिकेत समाजकार्य महाविद्यालयाचे डॉ. लोकेश नंदेश्वर, डॉ. बाबासाहेब आंबेडकर समाजकार्य महाविद्यालयाचे डॉ. मिलींद सवाई, डॉ. बाबासाहेब आंबेडकर शासकीय वसतिगृहाचे मुख्याध्यापक रमेश अजमिरे, गृहपाल वाडेकर, मुलींचे वसतिगृहाचे सुजाता पाटील प्रामुख्याने उपस्थित होते.

ही रॅली छत्रपती शिवाजी महाराज चौक येथून निघून बडे चौक, सरदार वल्लभभाई पटेल चौक, मुख्य डाक घर रोड, डॉ. बाबासाहेब आंबेडकर चौक, जिल्हाधिकारी कार्यालय चौक आदी मार्गे निघून रॅलीचे समापन सामाजिक न्याय भवन येथील भारत सरकारने लावलेल्या केंद्रीय संचार ब्युरोच्या मल्टीमिडीया छायाचित्र प्रदर्शन स्थळी करण्यात आले. यावेळी विद्यार्थ्यांनी प्रदर्शनाची पाहणी करून संविधान निर्मितीचा इतिहास जाणून घेतला. रॅलीतील मार्गात सरदार वल्लभभाई पटेल, राणी लक्ष्मीबाई, डॉ. बाबासाहेब आंबेडकर, महात्मा गांधी यांच्या पुतळ्यास पुष्पहार अर्पण करून अभिवादन करण्यात आले. यावेळी डॉ. बाबासाहेब आंबेडकर चौकात नागरीक व विद्यार्थ्यांनी संविधान प्रास्ताविकेचे वाचन करून डॉ.बाबासाहेब आंबेडकर यांच्या पुतळ्यास अभिवादन केले. या रॅलीत समाजिक न्याय व विशेष सहाय्य विभाग, माहिती व प्रसारण मंत्रालयाच्या केंद्रीय संचार ब्युरो, वर्धा, जात प्रमाणपत्र पडताळणी समिती कार्यालय, जिल्हा परिषद समाज कल्याण विभाग, बार्टी, कुंभलकर समाजकार्य महाविद्यालय, अनिकेत समाजकार्य महाविद्यालय, डॉ. बाबासाहेब आंबेडकर समाजकार्य महाविद्यालय, डॉ. बाबासाहेब आंबेडकर शासकीय वसतिगृह, शासकीय मुलींचे वसतिगृह यांच्यासह विविध शाळा, महाविद्यावयातील विद्यार्थी, नागरीक, शासकीय अधिकारी व कर्मचारी असे सुमारे पाच हजार लोकांनी सहभाग घेतला.