Petrol Price
विना तिकीट प्रवास करणाऱ्या १९२ प्रवाशांवर कारवाई : १.४९ लाखांचा दंड वसूल
- गोंदिया स्थानकासह गोंदिया-दुर्ग विभागात रेल्वेची विशेष तिकीट तपासणी मोहीम; ३४२ प्रकरणांत २ लाख १ हजार ८१५ रुपयांचा दंड
विदर्भ न्यूज एक्सप्रेस
प्रतिनिधी / गोंदिया : रेल्वेने विना तिकीट किंवा अनियमित प्रवास करण्याचा विचार करणाऱ्या प्रवाशांनी सावध होण्याची गरज आहे. दक्षिण-पूर्व-मध्य रेल्वेच्या नागपूर मंडळाकडून विना तिकीट व अनियमित प्रवासाला आळा घालण्यासाठी विशेष तिकीट तपासणी मोहीम राबविण्यात येत आहे. या मोहिमेंतर्गत गुरुवारी २० आगस्ट गोंदिया रेल्वे स्थानकासह गोंदिया-दुर्ग विभागात १९२ विना तिकीट प्रवाशांवर कारवाई करून १ लाख ४९ हजार २६५ रुपयांचा दंड वसूल करण्यात आला.
विना तिकीट प्रवास रोखण्यासोबतच प्रवाशांनी रेल्वेच्या नियमांचे पालन करावे आणि नियमित तिकीट घेऊनच प्रवास करावा, या उद्देशाने ही विशेष मोहीम राबविण्यात येत आहे. नागपूर मंडळाचे वरिष्ठ मंडळ वाणिज्य प्रबंधक दिलीप सिंग आणि सहायक वाणिज्य प्रबंधक अरविंद साव यांच्या नेतृत्वाखाली ही कारवाई करण्यात आली.
२४ गाड्यांमध्ये सखोल तिकीट तपासणी -
गुरुवारी राबविण्यात आलेल्या या विशेष मोहिमेत गोंदिया रेल्वे स्थानकासह गोंदिया-दुर्ग विभागातील २४ गाड्यांमध्ये सखोल तिकीट तपासणी करण्यात आली. रेल्वेच्या पथकाने प्रवाशांची तिकिटे तपासून विना तिकीट, अनियमित प्रवास तसेच विना बुकिंग सामानाच्या प्रकरणांवर कारवाई केली. या मोहिमेत एकूण ३४२ प्रकरणे आढळून आली. या सर्व प्रकरणांत रेल्वेने एकूण २ लाख १ हजार ८१५ रुपयांचा दंड आकारून वसूल केला.
विना तिकीट प्रवासाच्या १९२ प्रकरणांत १.४९ लाखांचा दंड -
तपासणीदरम्यान विना तिकीट प्रवास करणाऱ्या १९२ प्रवाशांवर कारवाई करण्यात आली. या प्रकरणांमध्ये रेल्वेने १ लाख ४९ हजार २६५ रुपये दंड वसूल केला. याशिवाय अनियमित तिकीटाच्या ६३ प्रकरणांत ४३ हजार ७५० रुपये, तर विना बुकिंग सामानाच्या ८७ प्रकरणांत ८ हजार ८०० रुपये दंड वसूल करण्यात आला.
कारवाईचा प्रकार प्रकरणे वसूल दंड
विना तिकीट प्रवास - १९२ - १,४९,२६५
अनियमित तिकीट - ६३ - ४३,७५०
विना बुकिंग सामान - ८७ - ८,८००
एकूण - ३४२ - २,०१,८१५
विशेष पथकाची नियुक्ती -
या विशेष तिकीट तपासणी मोहिमेसाठी रेल्वेकडून स्वतंत्र पथक गठित करण्यात आले आहे. सहायक वाणिज्य प्रबंधक अरविंद साव यांच्या नेतृत्वाखाली दोन वाणिज्य निरीक्षक, १० मुख्य तिकीट निरीक्षक, २२ चल तिकीट निरीक्षक आणि तीन एमटीएस कर्मचाऱ्यांचा या पथकात समावेश आहे.
या पथकाकडून रेल्वे स्थानकांसह धावत्या गाड्यांमध्ये तिकीट तपासणी केली जात आहे. विना तिकीट प्रवास करणाऱ्या प्रवाशांवर दंडात्मक कारवाई करण्याबरोबरच रेल्वेच्या नियमांबाबत प्रवाशांमध्ये जनजागृती करण्यावरही भर दिला जात आहे.
नियमांचे पालन करूनच प्रवास करा -
रेल्वे प्रशासनाने प्रवाशांना नियमित आणि योग्य तिकीट घेऊनच प्रवास करण्याचे आवाहन केले आहे. विना तिकीट किंवा अनियमित प्रवास केल्यास तपासणीदरम्यान दंडात्मक कारवाईला सामोरे जावे लागू शकते. त्यामुळे प्रवाशांनी प्रवासापूर्वी योग्य तिकीट घेणे तसेच सामानाची आवश्यक ती बुकिंग करणे गरजेचे आहे.
विशेष तिकीट तपासणी मोहिमेमुळे विना तिकीट प्रवास करणाऱ्यांवर कारवाईचा बडगा उगारण्यात आला असून, भविष्यातही अशा तपासण्या सुरू राहण्याची शक्यता आहे. त्यामुळे तिकीट आहे तरच प्रवास सुरक्षित या भूमिकेतून प्रवाशांनी रेल्वेच्या नियमांचे पालन करावे, असे आवाहन रेल्वे प्रशासनाकडून करण्यात आले आहे.
