Petrol Price
वाघाच्या वाढत्या दहशतीत ई-पीक पाहणीला नकार : महसूल सेवकांना जंगलात पाठवू नका
- महसूल सेवक संघटनेचे तहसीलदारांना निवेदन; वन्यप्राण्यांच्या वावराच्या भागात पर्यायी व्यवस्था करण्याची मागणी
विदर्भ न्यूज एक्सप्रेस
तालुका प्रतिनिधी / एटापल्ली : तालुक्यात जंगलालगत आणि अतिदुर्गम भागात वन्यप्राण्यांचा वाढता वावर लक्षात घेता ई-पीक पाहणीच्या कामासाठी महसूल सेवकांना प्रत्यक्ष शेतशिवारात पाठवू नये, अशी मागणी महसूल सेवक संघटना, एटापल्ली यांनी केली आहे. वन्यप्राण्यांच्या हल्ल्याचा तसेच सर्पदंशाचा धोका असल्याने क्षेत्रीय काम करणाऱ्या कर्मचाऱ्यांच्या सुरक्षिततेचा प्रश्न गंभीर बनला आहे. यासंदर्भात संघटनेने १८ ऑगस्ट रोजी तहसीलदारांना निवेदन सादर केले.
जंगलालगतच्या आणि वन्यप्राण्यांचा वावर असलेल्या भागात क्षेत्रीय काम सोपविताना कर्मचाऱ्यांच्या सुरक्षेसाठी आवश्यक उपाययोजना कराव्यात किंवा पर्यायी प्रशासकीय व्यवस्था करावी, अशी मागणी निवेदनातून करण्यात आली आहे. निवेदनाच्या प्रती जिल्हाधिकारी, उपविभागीय अधिकारी, एटापल्ली तसेच जिल्हा महसूल सेवक संघटना, गडचिरोली यांच्या जिल्हाध्यक्षांकडेही देण्यात आल्या आहेत.
जंगलालगतच्या गावांत भीतीचे वातावरण -
एटापल्ली तालुक्यातील अनेक गावे जंगलालगत असून, या भागात वन्यप्राण्यांचा वावर वाढला आहे. वाघ आणि अन्य वन्यप्राण्यांच्या भीतीमुळे अनेक शेतकरीदेखील जंगलालगतच्या शेतांमध्ये जाण्यास टाळाटाळ करीत आहेत. सध्या शेतीची कामे सुरू असल्याने शेतकरी आणि शेतमजुरांची शेतशिवारात मोठी वर्दळ असते. अशा परिस्थितीत महसूल सेवकांना ई-पीक पाहणीच्या सहाय्यक स्तरावरील कामासाठी प्रत्यक्ष शेतशिवारात पाठविणे धोकादायक ठरू शकते, असा आक्षेप संघटनेने घेतला आहे. वन्यप्राण्यांचा हल्ला किंवा सर्पदंश झाल्यास त्याची जबाबदारी कोणाची, असा प्रश्नही कर्मचाऱ्यांकडून उपस्थित केला जात आहे.
प्रशिक्षण झाले; मात्र सुरक्षेचे काय -
ई-पीक पाहणीसंदर्भात महसूल सेवकांना आवश्यक प्रशिक्षण देण्यात आले आहे. मात्र केवळ प्रशिक्षण घेतले म्हणून धोकादायक वनक्षेत्रात प्रत्यक्ष जाऊन काम करणे सुरक्षित होत नाही, अशी भूमिका संघटनेने मांडली आहे.वन्यप्राण्यांचा नियमित वावर असलेल्या भागात ठोस सुरक्षा व्यवस्था उपलब्ध करून न देता क्षेत्रीय कामाची सक्ती करू नये. कर्मचाऱ्यांना आवश्यक सुरक्षा साधने, स्थानिक पातळीवर मदत किंवा पर्यायी पद्धतीने पीक पाहणीची व्यवस्था उपलब्ध करून द्यावी, अशी मागणी संघटनेने केली आहे.
ई-पीक पाहणी रखडल्यास शेतकऱ्यांनाही फटका -
ई-पीक पाहणी ही शेतकऱ्यांच्या पीक नोंदीच्या दृष्टीने महत्त्वाची प्रक्रिया आहे. त्यामुळे कर्मचाऱ्यांच्या सुरक्षेचा प्रश्न सोडविताना ई-पीक पाहणीची प्रक्रिया वेळेत पूर्ण होईल, याचीही दक्षता घेणे आवश्यक आहे.पीक नोंद उपलब्ध नसल्यास शेतमाल विक्री, पीक कर्ज, विविध शासकीय योजना तसेच कृषीविषयक लाभ मिळविताना शेतकऱ्यांना अडचणी निर्माण होऊ शकतात. त्यामुळे कर्मचाऱ्यांना धोक्यात न घालता पीक पाहणी पूर्ण करण्यासाठी प्रशासनाने तातडीने पर्यायी व्यवस्था करावी, अशी अपेक्षा व्यक्त होत आहे.
गट्टेपल्ली परिसरात वाघाची दहशत -
दरम्यान, तालुक्यातील गट्टेपल्ली परिसरात वाघाने बैलाची शिकार केल्याची घटना समोर आली आहे. या घटनेनंतर परिसरातील नागरिकांमध्ये भीतीचे वातावरण निर्माण झाले असून, तालुक्यातील अनेक गावांमध्ये वाघाचा वावर असल्याची चर्चा आहे.सध्या शेतीची कामे सुरू असल्याने शेतकरी, शेतमजूर आणि पशुपालकांची शेतशिवारात मोठी वर्दळ आहे. त्यामुळे वन्यप्राण्यांशी संघर्ष होण्याची शक्यता वाढली आहे. वनविभागाकडून ट्रॅप कॅमेऱ्यांच्या माध्यमातून वाघाच्या हालचालींवर लक्ष ठेवण्यात येत आहे.
कर्मचाऱ्यांच्या सुरक्षेला प्राधान्य द्या -
ई-पीक पाहणी ही शेतकऱ्यांसाठी महत्त्वाची असली तरी ती पूर्ण करताना महसूल कर्मचाऱ्यांच्या जीविताला धोका निर्माण होणार नाही, याची काळजी घेणे आवश्यक आहे. जंगलालगतच्या गावांमध्ये वन्यप्राण्यांचा धोका लक्षात घेऊन प्रशासनाने महसूल सेवक, शेतकरी आणि शेतमजूर यांच्या सुरक्षेसाठी समन्वयाने उपाययोजना करण्याची गरज निर्माण झाली आहे.वन्यप्राण्यांच्या वावराच्या धोकादायक भागात कर्मचाऱ्यांना प्रत्यक्ष पाठविण्याऐवजी सुरक्षित आणि व्यवहार्य पर्याय उपलब्ध करून द्यावा, अशी मागणी महसूल सेवक संघटनेने केली आहे.
