Petrol Price
जव्हेरी कन्या विद्यालयात विद्यार्थिनींना स्वसंरक्षणाचे धडे
विदर्भ न्यूज एक्सप्रेस
तालिका प्रतिनिधी / बल्लारपूर : मोहसीनभाई जव्हेरी कन्या विद्यालय व कनिष्ठ महाविद्यालय, बल्लारपूर येथे चंद्रपूर पोलीस विभाग व पोलीस स्टेशनच्या सहकार्याने स्वसंरक्षण प्रशिक्षण व विद्यार्थी सुरक्षा जनजागृती कार्यक्रम घेण्यात आला. या कार्यक्रमात जनजागृती रथातील प्रोजेक्टरच्या माध्यमातून सायबर सुरक्षा, व्यसनमुक्ती आणि महिला संरक्षण या विषयांवर माहितीपर व्हिडिओ दाखवून विद्यार्थ्यांमध्ये जनजागृती करण्यात आली. पोलीस हवालदार बळीराम पवार व पोलीस अंमलदार नागेंद्र चव्हाण यांनी विद्यार्थ्यांना विविध सुरक्षा उपायांबाबत मार्गदर्शन केले.
यावेळी पोलीस हवालदार प्रवीण रामटेके, पोलीस अंमलदार अभिषेक आडे तसेच मार्शल आर्ट प्रशिक्षक वाजिद अली यांच्या मार्गदर्शनाखाली विद्यार्थिनींना स्वसंरक्षणाच्या विविध तंत्रांचे प्रशिक्षण व प्रात्यक्षिके देण्यात आली. मार्शल आर्टचे विद्यार्थी साक्षी रणवीर, आर्यन रायपुरे व हसरत अली यांनीही प्रात्यक्षिकांच्या माध्यमातून स्वसंरक्षणाचे धडे दिले.
कार्यक्रमानंतर विद्यार्थी व शिक्षकांना सुरक्षा मंत्र या पुस्तकाचे वाटप करण्यात आले. या उपक्रमामुळे विद्यार्थिनींमध्ये आत्मविश्वास वाढविण्यासोबतच सुरक्षिततेबाबत जागरूकता निर्माण झाली. कार्यक्रमाच्या शेवटी विद्यालयाच्या प्राचार्या असमा खान यांनी उपस्थितांचे आभार मानले. यावेळी शिक्षक, शिक्षकेत्तर कर्मचारी व विद्यार्थी उपस्थित होते.
