Petrol Price
वीज वाचवा, भविष्य घडवा! विज्ञान प्रदर्शनात बल्लारपूर पब्लिक स्कूलच्या विद्यार्थिनींची प्रथम क्रमांकाची झेप
विदर्भ न्यूज एक्सप्रेस
तालुका प्रतिनिधी / बल्लारपूर : विजेची बचत आणि ऊर्जा संवर्धनाचा प्रभावी संदेश देणाऱ्या बल्लारपूर पब्लिक स्कूल, येनबोडी येथील विद्यार्थिनींनी तालुकास्तरीय विज्ञान प्रदर्शनात प्रथम क्रमांक पटकावून शाळेच्या शिरपेचात मानाचा तुरा रोवला आहे. यशस्वी दशरथ पारेकर आणि मंजिरी गोवर्धन चालूरकर या विद्यार्थिनींनी ‘सेव्ह इलेक्ट्रिसिटी’ या नाविन्यपूर्ण विज्ञान प्रतिकृतीच्या माध्यमातून हे यश संपादन केले. त्यांच्या या उल्लेखनीय कामगिरीमुळे दोघींची जिल्हास्तरीय विज्ञान प्रदर्शनासाठी निवड झाली आहे.
इयत्ता सहावी ते आठवी या गटात सादर करण्यात आलेल्या या प्रकल्पातून विजेचा योग्य वापर, ऊर्जेची बचत आणि ऊर्जा संवर्धनाचे महत्त्व अधोरेखित करण्यात आले. आजच्या काळात विजेची बचत ही केवळ गरज नसून भविष्यातील ऊर्जा संकट टाळण्यासाठी महत्त्वाचे पाऊल आहे. हाच संदेश विद्यार्थिनींनी आपल्या प्रकल्पातून प्रभावीपणे मांडला. त्यांच्या कल्पकतेने आणि वैज्ञानिक दृष्टिकोनातून साकारलेल्या प्रतिकृतीने परीक्षकांचे लक्ष वेधून घेत प्रथम क्रमांक मिळविला.
या यशासाठी विद्यार्थिनींना शाळेचे शिक्षक मिकिन्स कामटे यांचे मोलाचे मार्गदर्शन लाभले. विद्यार्थिनींच्या या यशाबद्दल संस्थेचे अध्यक्ष संजय वासाडे, व्यवस्थापिका डॉ. मेघा शुक्ला आणि प्राचार्य ज्योत्स्ना बाबुलकर यांनी दोन्ही विद्यार्थिनींसह मार्गदर्शक शिक्षकांचे अभिनंदन केले. तसेच आगामी जिल्हास्तरीय विज्ञान प्रदर्शनासाठी शुभेच्छा दिल्या.
विद्यार्थ्यांमध्ये वैज्ञानिक दृष्टिकोन, सर्जनशीलता आणि पर्यावरणाविषयी जागरूकता निर्माण व्हावी, यासाठी बल्लारपूर पब्लिक स्कूल सातत्याने प्रयत्नशील आहे. तालुकास्तरीय विज्ञान प्रदर्शनातील या यशामुळे शाळेच्या शैक्षणिक गुणवत्तेची आणि विद्यार्थिनींच्या कल्पकतेची पुन्हा एकदा प्रचिती आली आहे.
