महत्वाच्या बातम्या

शेतकऱ्यांना रब्बीतही मिळाला २७२ कोटींच्या पिककर्जाचा आधार

- रब्बीत १७ हजार शेतकऱ्यांना पिककर्ज

- स्टेट बॅंक ऑफ इंडियाचे सर्वाधिक वाटप

विदर्भ न्यूज एक्सप्रेस

प्रतिनिधी / वर्धा : गेल्या हंगामात वर्धा जिल्ह्याने पिककर्ज वाटपाचा उच्चांक गाठला आहे. यावर्षी पहिल्यांदाच ९३१ कोटी रुपयांचे कर्ज वितरीत करण्यात आले. दरवर्षी खरीप हंगामासाठी मोठ्या प्रमाणावर कर्ज वितरण केले जाते. यावर्षी मात्र रब्बी हंगामात देखील तब्बल २७२ कोटी रुपयांचे पिककर्ज वाटप करण्यात आले आहे. या कर्जामुळे शेतकऱ्यांना खरीपासोबतच रब्बीचे देखील पिक घेण्यास मोठ्या आधार मिळाला आहे.

जिल्ह्यात विविध राष्ट्रीयकृत, सहकारी व खाजगी बँकांच्यावतीने पिककर्ज वाटप केले जाते. संबंधित बँकांच्या शाखांना लगतच्या गावातील शेतकऱ्यांना जोडून देण्यात आले असून वेळेत पिककर्ज देण्याच्या सूचना प्रशासनाकडून वारंवार दिल्या जातात. जिल्ह्यात विविध बँकांच्या १३५ शाखांच्यावतीने कर्ज वाटप केले जाते. यावर्षी बहुतांश बॅंकांनी चांगले वाटप केले आहे. विशेष म्हणजे रब्बी हंगामासाठी देखील यावर्षी पहिल्यांदाच मोठ्या प्रमाणावर कर्ज वाटप करण्यात आले आहे.

रब्बी हंगामातील कर्ज वाटपात काही बॅंकांची कामगिरी उत्कृष्ट आहे. जिल्ह्यात या हंगामात १७ हजार ५२३ शेतकऱ्यांना २७२ कोटींचे वाटप करण्यात आले आहे. त्यात स्टेट बँक ऑफ इंडिया रब्बी कर्ज वाटपात आघाडीवर आहे. या बँकेने त्यांना दिलेल्या उद्दिष्टाच्या १८३ टक्के वाटप केले आहे. त्यात ८ हजार ९६ शेतकऱ्यांना १२६ कोटी ३८ लक्ष रुपयांच्या वाटपाचा समावेश आहे. उद्दिष्टापेक्षा जास्त कर्जवाटप करणाऱ्या बॅंकांमध्ये बॅंक ऑफ इंडिया ५ हजार ९४ शेतकऱ्यांना ७५ कोटी १४६ टक्के, एचडीएफसी बॅंक ४२३ शेतकऱ्यांना ९ कोटी ५८ लाख १०८ टक्के वाटप केले आहे.

यासोबतच ॲक्सीस बँक १२८ शेतकऱ्यांना ३ कोटी ४० लाख, बँक ऑफ बडोदा ५२० शेतकरी ६ कोटी ७८ लाख, बँक ऑफ महाराष्ट्र ७९६ शेतकरी ११ कोटी, कॅनरा बँक ३५३ शेतकरी ३ कोटी २५ लाख, सेंट्रल बँक ऑफ इंडिया २४५ शेतकरी २ कोटी ८५ लाख, इंडियन बँक ४५५ शेतकरी ५ कोटी ७२ लाख, आयसीआयसीआय बँक ५५८ शेतकरी ९ कोटी, आयडीबीआय बँक ३७ शेतकरी ४४ लाख, इंडियन ओव्हरसीज बँक २४ शेतकरी ४५ लाख, पंजाब नॅशनल बँक ४५६ शेतकरी १० कोटी ५२ लाख, युको बँक ४४ शेतकरी ५९ लाख, युनियन बँक १८९ शेतकरी ५ कोटी ४३ लाख तर विदर्भ कोकण ग्रामीण बँकेने १०५ शेतकऱ्यांना १ कोटी ४२ लाख रुपयांचे कर्ज वाटप केले आहे.