Petrol Price
गोटूल भूमीच्या विकासासाठी स्वतंत्र अभ्यासगट नेमणार - आमदार डॉ. मिलिंद नरोटे
- आदिवासी समाजाच्या सर्वांगीण विकासासाठी एकजुटीने प्रयत्न करण्याचे आवाहन; दसऱ्यानिमित्त देवी-देवतांची महापूजा संपन्न
विदर्भ न्यूज एक्सप्रेस
प्रतिनिधी / गडचिरोली : आदिवासी समाजाच्या सर्वांगीण विकासासाठी समाजातील सर्व घटकांनी राजकीय मतभेद बाजूला ठेवून एकत्र येणे आवश्यक आहे. समाजातील युवकांना शिक्षण, क्रीडा, रोजगार आणि विविध क्षेत्रांत प्रगती करण्यासाठी प्रोत्साहन व मार्गदर्शन मिळावे, यासाठी सामूहिक प्रयत्न करणे गरजेचे आहे. गडचिरोलीतील गोटूल भूमीचा नियोजनबद्ध विकास करून ती आदिवासी समाजाच्या एकतेचे, अस्मितेचे आणि प्रगतीचे केंद्र बनविण्यासाठी आपण कटिबद्ध असल्याचे प्रतिपादन आमदार डॉ. मिलिंद नरोटे यांनी केले.
दसरा सणानिमित्त जिल्हा गोटूल समिती, गडचिरोली आणि विविध आदिवासी संघटनांच्या संयुक्त विद्यमाने चांदाळा रोड येथील गोटूल भूमीवर आयोजित आदिवासी देवी-देवतांच्या महापूजा कार्यक्रमात ते बोलत होते. यावेळी आदिवासी संस्कृती, परंपरा आणि सामाजिक एकात्मतेचे दर्शन घडले. समाजातील दिवंगत बांधवांना मौन पाळून श्रद्धांजली अर्पण करण्यात आली, तसेच समाजाचे ऐक्य, अधिकार आणि कर्तव्यभावना जोपासण्याची प्रतिज्ञा घेण्यात आली.
गडचिरोलीतील गोटूल भूमी गोटूल समितीच्या नावे होणे ही आदिवासी समाजाच्या दृष्टीने महत्त्वपूर्ण उपलब्धी असल्याचे आमदार डॉ. नरोटे यांनी नमूद केले. या भूमीचा विकास करताना स्वतंत्र अभ्यासगटाच्या माध्यमातून सर्वंकष नियोजन करण्यात येईल. नियोजनानंतरच विकासकामांना सुरुवात केली जाईल. तसेच गोटूल भूमीला संरक्षण भिंत उभारण्याच्या मागणीचाही सकारात्मक विचार करण्यात येईल, असे त्यांनी सांगितले.
आदिवासी समाजातील बुद्धिजीवी, लोकप्रतिनिधी, अधिकारी, डॉक्टर, प्राध्यापक, अभियंते आणि युवकांनी समाजाच्या प्रगतीसाठी एकत्रितपणे काम करण्याची गरज त्यांनी व्यक्त केली. समाजातील होतकरू विद्यार्थी, गुणवंत खेळाडू आणि प्रतिभावान युवकांना योग्य मार्गदर्शन व प्रोत्साहन मिळाल्यास ते विविध क्षेत्रांत उल्लेखनीय कामगिरी करू शकतात. युवकांनी मोठी स्वप्ने पाहून ती पूर्ण करण्यासाठी प्रयत्न करावेत. त्यांच्या स्वप्नांना बळ देण्यासाठी लोकप्रतिनिधी म्हणून सर्वतोपरी सहकार्य करण्यात येईल, अशी ग्वाही आमदार डॉ. नरोटे यांनी दिली.
आदिवासी समाजातील युवक-युवतींमध्ये आत्महत्यांसारख्या दुर्दैवी घटना रोखण्यासाठी समाजाने एकत्रितपणे पुढाकार घेऊन सकारात्मक आणि विश्वासपूर्ण वातावरण निर्माण करणे आवश्यक असल्याचे त्यांनी सांगितले. समाजहिताच्या प्रश्नांवर अभ्यासपूर्ण व प्रगल्भ भूमिका घेऊन युवकांना योग्य दिशा देण्याचे आवाहनही त्यांनी केले.
गोटूल भूमी ही केवळ एक जागा नसून आदिवासी समाजाच्या संस्कृती, परंपरा, अस्मिता आणि एकतेचे प्रतीक आहे. या भूमीच्या विकासासाठी समाजबांधवांनी आपल्या सूचना व संकल्पना मांडाव्यात. लोकसहभागातून विकासकामे पूर्ण करून आदिवासी समाजाच्या उज्ज्वल भविष्यासाठी सर्वांनी एकजुटीने कार्य करावे, असे आवाहन आमदार डॉ. मिलिंद नरोटे यांनी केले.
या कार्यक्रमाला माजी खासदार तथा भाजपा राष्ट्रीय महामंत्री (अनुसूचित जमाती) अशोकजी नेते, माजी आमदार तथा प्रदेशाध्यक्ष आदिवासी मोर्चा डॉ. देवरावजी होळी, माजी आमदार डॉ. नामदेवरावजी उसेंडी, डॉ. नितीनजी कोडवते, गोटूल समितीचे अध्यक्ष नंदुजी नरोटे, प्रकाशजी गेडाम, माधवराव गावळ, डॉ. चंदाताई कोडवते, वैशालीताई नरोटे, माधुरीताई मडावी, मारोतराव इचोडकर, सदानंदजी ताराम, अमरसिंहजी गेडाम, सहाय्यक आयुक्त समाजकल्याण डॉ. सचिन मडावी यांच्यासह विविध आदिवासी संघटनांचे पदाधिकारी, समाजातील ज्येष्ठ मंडळी आणि समाजबांधव मोठ्या संख्येने उपस्थित होते.
