Petrol Price
मिनी ट्रॅक्टर योजनेसाठी स्वयंसहाय्यता बचत गटांना : ३१ ऑगस्टपर्यंत अर्ज सादर करण्याचे आवाहन
विदर्भ न्यूज एक्सप्रेस
प्रतिनिधी / नागपूर : अनुसूचित जाती व नवबौद्ध घटकांतील स्वयंसहाय्यता बचत गटांना आर्थिकदृष्ट्या सक्षम करण्याच्या उद्देशाने सामाजिक न्याय विभागामार्फत ९० टक्के अनुदानावर ९ ते १८ अश्वशक्ती क्षमतेचा मिनी ट्रॅक्टर व त्याची उपसाधने उपलब्ध करून देण्याची योजना राबविण्यात येत आहे. सन २०२६-२०२७ या वर्षासाठी शासन निर्णयानुसार निर्धारित अटी व शर्ती पूर्ण करणाऱ्या पात्र स्वयंसहाय्यता बचत गटांना या योजनेंतर्गत मिनी ट्रॅक्टरचे वाटप करण्यात येणार आहे.
शेती व कृषीपूरक कामांसाठी यांत्रिकीकरणाला चालना मिळावी तसेच अनुसूचित जाती व नवबौद्ध घटकांतील बचत गटांचे उत्पन्न वाढून त्यांना आर्थिकदृष्ट्या स्वावलंबी होता यावे, या उद्देशाने ही योजना महत्त्वपूर्ण ठरणार आहे. योजनेअंतर्गत पात्र ठरणाऱ्या बचत गटांना ९ ते १८ अश्वशक्तीचा मिनी ट्रॅक्टर तसेच आवश्यक उपसाधनांचा पुरवठा ९० टक्के अनुदानाच्या माध्यमातून करण्यात येणार आहे.
सन २०२६-२०२७ साठी शासनाने निश्चित केलेल्या अटी व शर्तींनुसार पात्र ठरणाऱ्या स्वयंसहाय्यता बचत गटांची निवड करून त्यांना मिनी ट्रॅक्टरचा लाभ देण्यात येणार आहे. यासाठी योजनेचे अर्ज प्रत्यक्ष सामाजिक न्याय विभागाच्या कार्यालयात उपलब्ध करून देण्यात आले आहेत.
३१ ऑगस्टपर्यंत अर्ज सादर करा -
नागपूर जिल्ह्यातील योजनेचा लाभ घेण्यास इच्छुक असलेल्या स्वयंसहाय्यता बचत गटांनी आवश्यक माहिती व कागदपत्रांसह परिपूर्ण अर्ज ३१ ऑगस्ट २०२६ पर्यंत सादर करावेत, असे आवाहन सहाय्यक आयुक्त, समाज कल्याण यांनी केले आहे. अर्ज सादर करताना शासनाने निर्धारित केलेल्या सर्व अटी व शर्तींची पूर्तता करणे आवश्यक आहे.
योजनेच्या पात्रतेसंदर्भातील अटी, आवश्यक कागदपत्रे, अर्ज प्रक्रिया तसेच इतर सविस्तर माहितीसाठी इच्छुक बचत गटांनी सहाय्यक आयुक्त, समाज कल्याण यांचे कार्यालय, सामाजिक न्याय भवन, आयटीआयसमोर, श्रद्धानंद पेठ, नागपूर येथे संपर्क साधावा, असे आवाहन करण्यात आले आहे.
अनुसूचित जाती व नवबौद्ध घटकांतील पात्र स्वयंसहाय्यता बचत गटांनी या योजनेचा लाभ घेण्यासाठी अंतिम मुदतीची प्रतीक्षा न करता आवश्यक कागदपत्रांसह परिपूर्ण अर्ज विहित मुदतीत सादर करावेत, असे विभागाने स्पष्ट केले आहे.
