महत्वाच्या बातम्या

ग्रामीण भागातील प्राथमिक आरोग्य केंद्राच्या सुविधांचा नागरिकांनी लाभ घ्यावा : जिल्हा आरोग्य अधिकारी

विदर्भ न्यूज एक्सप्रेस
प्रतिनिधी / नागपूर : जिल्ह्यातील प्राथमिक आरोग्य केंद्रांमध्ये शासनाच्या निकषानुसार सर्व सुविधा औषधींसह उपलब्ध आहेत. प्राथमिक आरोग्य केंद्रांमध्ये बाह्य रुग्णसेवा, आंतर रुग्णसेवा, नॉर्मल प्रसूती, कुटुंब कल्याण शस्त्रक्रिया व कल्याण साधनांचा वाटप तसेच इतर राष्ट्रीय कार्यक्रम राबविले जात आहेत.

तसेच सर्व गरोदर मातांची नोंदणी, तपासण्या, औषधोपचार, लसीकरण, तसेच आरसीएच पोर्टलवर प्रत्येक मातेला युआयडी नंबर निकषाप्रमाणे दिले जात आहेत. त्याचबरोबर मातेला वैयक्तिक स्वच्छता, आहार, बाळाची काळजी व संगोपन याविषयी मार्गदर्शन केले जाते. कुटुंब नियोजन साधनांविषयी समुपदेशन केले जाते. ग्रामीण भागातील प्राथमिक आरोग्य केंद्रांच्या सुविधांचा नागरिकांनी लाभ घेण्याचे आवाहन जिल्हा आरोग्य अधिकारी डॉ. अजय डवले यांनी केले आहे.

प्राथमिक आरोग्य केंद्रांमध्ये स्त्रीरोग तज्ज्ञ, भूलतज्ज्ञ व बालरोग तज्ज्ञाची पदे मंजुर नसल्याने गुंतागुतीची प्रसुती असल्यास सिझेरियन शस्त्रक्रिया अथवा रुग्णांना तज्ज्ञ सेवांची गरज पडल्यास त्यांना ग्रामीण रुग्णालय, उपजिल्हा रुग्णालय, डागा स्त्री रुग्णालय, इंदिरा गांधी वैद्यकीय महाविद्यालय व रुग्णालय, शासकीय वैद्यकीय महाविद्यालय व रुग्णालय नागपूर येथे आवश्यकतेनुसार संदर्भ सेवा देण्यात येते. काही प्राथमिक आरोग्य केंद्रांच्या इमारत जीर्ण झाल्याने नवीन इमारतीचे बांधकाम तसेच डिलिव्हरी रुमची दुरुस्ती सन २०२३ -२४ मध्ये प्रस्तावित करण्यात आलेली आहे. या करीता तेथील प्रसुती संदर्भित केल्या जातात.

हिंगणा तालुक्यातील प्राथमिक आरोग्य केंद्र रायपूर व मौदा तालुक्यातील प्राथमिक आरोग्य केंद्र चिरवा येथे नवीन इमारत बांधकाम सुरू आहे. तिष्टी प्राथमिक आरोग्य केंद्रांत दुरुस्तीची कामे प्रस्तावीत आहेत. प्राथमिक आरोग्य केंद्र कचारी सावंगा येथे पाच प्रसूती झालेल्या आहेत. तालुका हिंगणा, मौदा, ग्रामीण हा शहरालगत आहे (उप शहरी विभाग) त्यामुळे ह्या तालुक्यातील लोकांना इंदिरा गांधी वैद्यकीय महाविद्यालय व रुग्णालय, शासकीय वैद्यकीय महाविद्यालय नागपूर, एम्स, डागा रुग्णालय हे चार मोठे हॉस्पिटल जवळ पडतात व या भागात खाजगी हॉस्पिटल ही मोठ्या प्रमाणात आहे. त्यामुळे गरोदर माता प्रसुतीसाठी या मोठ्या रुग्णालयात जाणे पसंत करतात.

सन २०२२-२३ मध्ये प्रा. आ. केंद्र भिष्णूरला जिल्ह्यातील प्रथम कायाकल्प पुरस्कार प्राप्त झालेल्या आहे व जिल्हयातील प्राथमिक आरोग्य केंद्राअंतर्गत १०० टक्के प्रसूती या संस्थात्मक होत आहेत. तसेच आरोग्य विभाग नागपूर मार्फत अनेक नाविन्यपूर्ण कार्यक्रम जसे माता सुरक्षित तर घर सुरक्षित जागृक पालक सुदृढ बालक, मिशन इंद्रधनुष्य राबविले जात असल्याचे जिल्हा आरोग्य अधिकारी यांनी कळविले आहे.