गोव्यात भाजपच्या नव्या मुख्यमंत्र्याचा शोध घेण्यासाठी रात्रभर आमदारांसोबत बैठका


वृत्तसंस्था / पणजी :  मुख्यमंत्री मनोहर पर्रीकर यांचे काल १७ मार्च रोजी निधन झाले. त्यांच्या निधनाने गोव्यात राजकीय संकट निर्माण झाले आहे. काँग्रेसने राज्यापालांना चिठ्ठी लिहून गोव्यात सत्ता स्थापन करण्याचा दावा केलेला असतानाच भाजपनेही नव्या मुख्यमंत्र्याचा शोध घेण्यासाठी रात्रभर आमदारांसोबत बैठका घेतल्या.  केंद्रीय परिवहन मंत्री नितीन गडकरी यांच्या उपस्थितीत  आयोजित  बैठकीला मित्र पक्ष आणि काही अपक्ष आमदारही उपस्थित होते.  
गोव्यात भारतीय जनता पक्षाच्या नेतृत्वाखाली आघाडीचे सरकार असून, त्यात गोवा फॉरवर्ड पक्ष, महाराष्ट्रवादी गोमांतक पक्ष आणि अपक्षांचा समावेश आहे. या पक्षांनी केवळ पर्रीकर यांच्यासाठीच सरकारला पाठिंबा दिला आहे. आता पर्रीकर यांच्या निधनामुळे हे पक्ष कोणती भूमिका घेतात हे महत्त्वाचे ठरणार आहे. पर्रीकर हे पणजी विधानसभा मतदारसंघातून निवडून आले होते. तिथे आता पोटनिवडणूक होईल. पुढील महिन्यांत गोव्यात तीन विधानसभा मतदारसंघात पोटनिवडणूक होत आहे. ४० जागांचे संख्याबळ आता ३६ वर आले आहे. पर्रीकर यांच्याजागी भाजपला नवा नेता निवडावा लागणार असून, त्यास इतर पक्षांचा पाठिंबा देणारे पत्र राज्यपाल मृदुला सिन्हा यांच्याकडे सादर करावे लागेल. जर या स्थितीत सिन्हा यांची खात्री पटली नाही तर मात्र त्या सर्वांत मोठ्या पक्षाला सरकार स्थापनेसाठी आमंत्रित करू शकतात, असे विधीमंडळातील एका वरिष्ठ अधिकाऱ्याने सांगितले. 
पर्रीकर यांची प्रकृती अत्यंत चिंताजनक असल्याचे वृत्त सायंकाळी प्रसिद्ध झाले होते. त्यानंतर गोवा फॉरवर्ड पक्षाचे तीन आणि महाराष्ट्रवादी गोमांतक पक्षाच्या तीन आमदारांची सायंकाळी उशीरा स्वतंत्र बैठका झाल्या. काँग्रेसने राज्यपाल मृदुला सिन्हा यांच्याकडे गोव्यात सरकार स्थापनेसाठी दावा केला आहे. मुख्यमंत्री पर्रीकरांच्या अनुपस्थितीमुळे आणि आमदार फ्रान्सिस डिसुझा यांच्या निधनामुळे गोव्यातील सत्ताधारी पक्ष अल्पमतात आले आहे. तसेच, राज्यात सध्या निर्णायकी अवस्था असल्यामुळे राज्यातील भाजप सरकार बरखास्त करण्यात यावे,' अशी मागणीही सिन्हा यांच्याकडे केली आहे. भाजप पक्षाचे सरकार दिल्लीसह गोव्यातही मजबूत आणि स्थिर आहे. गोव्यात बदलत्या परिस्थितीसाठी आम्ही नवीन पर्यायाचा विचार सुरू केला आहे. तसेच, भाजप सर्व प्रसंगाना यशस्वीपणे तोंड देण्यासाठी समर्थ असून, नागरिकांनी सोशल मीडियाद्वारे पसरविण्यात येणाऱ्या कोणत्याही अफवा, बातम्यांवर विश्वास ठेवू नये,' असे भाजपचे माध्यम समन्वयक संदेश साधले यांनी एका पत्रकाद्वारे स्पष्ट केले आहे. 
दरम्यान, गोव्यात विधानसभेच्या तीन जागांसाठी पोटनिवडणूक होत असून, निवडणूक होईपर्यंत विधानसभा स्थगित होण्याची शक्यता असल्याचे महाराष्ट्रवादी गोमांतरक पक्षाचे अथ्यक्ष दीपक ढवळीकर यांनी म्हटले आहे. 'गोवा राजकीय स्थित्यंतरातून जात आहे. अद्याप पेच निर्माण झालेला नाही. पण पर्रीकर यांच्यानंतर पेच होऊ शकतो,' असे त्यांनी निवेदनात म्हटले आहे.  



  Print






News - World | Posted : 2019-03-18






Related Photos