महत्वाच्या बातम्या

 जनजातीय गौरव दिवस सेवा सप्ताहानिमित्त स्मारकांची स्वच्छता व दीपोत्सव


विदर्भ न्यूज एक्सप्रेस 
प्रतिनिधी / वर्धा : क्रांतिसूर्य भगवान बिरसा मुंडा यांच्या जयंतीनिमित्त तसेच जनजातीय गौरव दिवस सेवा सप्ताहच्या अनुषंगाने वर्धा शहरातील विविध महापुरुषांच्या स्मारक परिसरात स्वच्छता मोहिम राबविण्यात आली. या उपक्रमांतर्गत स्मारक परिसराची स्वच्छता करून सायंकाळी स्मारकांवर दीपप्रज्वलन करण्यात आले. दीपोत्सवाच्या माध्यमातून महापुरुषांना अभिवादन करण्यात आले.

सकाळी राबविण्यात आलेल्या स्वच्छता मोहिमेदरम्यान स्मारक परिसरातील कचरा, पालापाचोळा व इतर अस्वच्छता दूर करून परिसर स्वच्छ व सुंदर करण्यात आला. त्यानंतर सायंकाळी स्मारक परिसरात दिवे प्रज्वलित करून दीपोत्सव साजरा करण्यात आला. दीपांच्या प्रकाशाने स्मारक परिसर उजळून निघाला आणि संपूर्ण वातावरणात उत्साह व चैतन्य निर्माण झाले.

भगवान बिरसा मुंडा यांनी आदिवासी समाजाच्या हक्कांसाठी, स्वाभिमानासाठी आणि जल, जंगल व जमिनीच्या संरक्षणासाठी दिलेल्या संघर्षमय योगदानाचे स्मरण करणे तसेच महापुरुषांचे विचार व कार्य नव्या पिढीपर्यंत पोहोचविणे हा या उपक्रमाचा मुख्य उद्देश होता. जनजातीय गौरव दिवस सेवा सप्ताहाच्या माध्यमातून आदिवासी समाजाचा गौरवशाली इतिहास, संस्कृती व परंपरांचे जतन व संवर्धन करण्यासोबतच सामाजिक बांधिलकी, स्वच्छता आणि महापुरुषांप्रती कृतज्ञता व्यक्त करणारे विविध उपक्रम राबविण्यात येत आहेत.





  Print






Related Photos