३३ कोटी वृक्षलागवडीचा १० दिवसांत अहवाल पाठवा : विकास खारगे


-  वृक्षलागवडीची संधी समजून पूर्ण तयारी करा 
विदर्भ न्यूज एक्सप्रेस 
प्रतिनिधी /  नागपूर : 
राज्य शासनाच्या ३३ कोटी वृक्षारोपणमोहिमच्या सूक्ष्म नियोजनाची तयारी करुन विभागातील सर्व जिल्ह्यांनी त्यांचे अहवाल ३० जानेवारीपर्यंत पाठवावेत, असे निर्देश वन विभागाचे प्रधान सचिव विकास खारगे यांनी आज दिले.
जिल्हाधिकारी कार्यालयातील बचत भवन सभागृहात जुलै २०१९  च्या वृक्ष लागवड कार्यक्रमाच्या पूर्वतयारीचा आढावा घेताना ते बोलत होते. यावेळी विभागीय आयुक्त डॉ. संजीव कुमार यांच्यासह जिल्हाधिकारी अश्विन मुदगल, शांतनू गोयल, शेखर सिंग, डॉ. कादंबरी बलकवडे, शैलेश नवाल, डॉ. कुणाल खेमनार, जिल्हा परिषदेचे मुख्य कार्यकारी अधिकारी संजय यादव, जितेंद्र पापळकर यांच्यासह वन विभागाचे उमेशकुमार अग्रवाल, डॉ. एस. एच. पाटील, डॉ. प्रवीण श्रीवास्तव, बी. एस. हुडा, एम. श्रीनिवास राव, अनुराग चौधरी तसेच संजीव गौर उपस्थित होते.
३३  कोटी वृक्ष लागवड हा राज्य शासनाचा महत्त्वाकांक्षी कार्यक्रम असून, केवळ उद्दिष्टपूर्तीसाठी वृक्षारोपण करायचे नाही तर जागतिक तापमानवाढीवर मात करून राज्यात हरित पट्टे तयार करायचे आहेत. त्यासाठी आपापल्या जिल्ह्यातील विविध‍ विभागाच्या अधिनस्त असणारी विभागांची कार्यालये, शाळा, महाविद्यालये, रुग्णालये, शिक्षणसंस्था, रस्ते, इमारती, पांदणरस्ते, पाझरतलाव, बोडी, धरणे, ओढे –नाले, नदीकाठ आदि भागातील मोकळ्या जागी वृक्षारोपण करुन त्या वृक्षांची जगण्याची टक्केवारीही वाढली पाहिजे,यासाठी प्रयत्न करण्यास प्रधान सचिव विकास खारगे यांनी सांगितले.
राज्यातील मोकळ्या जागांमध्ये वृक्षारोपण वाढवून राज्य हिरवेगार करण्यासाठी रस्त्यांच्या दुतर्फा प्रती किलोमिटरला ४०० वृक्ष लागवड करता येणार आहे. त्यासाठी जिल्हा परिषदेअंतर्गंत येणारे ग्रामीण रस्ते, पांदण रस्ते यांवर लक्ष केंद्रीत करावे, पूर्वी लावलेल्या वृक्षाच्या जागा बदलून जागांची योग्य निवड करा, वृक्षांना ट्रीगार्ड लावून त्यांची निगा राखल्यास वृक्षांच्या जगण्याचे प्रमाण वाढेल. येत्या दोन वर्षांत वृक्षांची लागवड करण्याची एक चांगली संधी समजावी,असे विकास खारगे यावेळी म्हणाले.
पाणीपुरवठा योजनेच्या माध्यमातून वृक्षारोपणात वाढ करता येईल, असे सांगताना त्यांनी खाजगी मालकीच्या मोकळ्या जागेत रानमळा योजनेच्या धर्तीवर वृक्षलागवड करावी, विवाह, जन्म, मृत्यू आदि प्रसंगी १ जुलै रोजी कार्यक्रम ठेवून त्या-त्या घरी वृक्षरोपे देण्यासाठी संबंधित गटविकास अधिकारी,  विस्तार अधिकारी, ग्रामसेवकांच्या बैठका घेण्याबाबत श्री. खारगे यांनी सूचना केल्या. जिल्हा परिषदेअंतर्गंत येणाऱ्या ग्रामविकास, शिक्षण विभाग, पशुसंवर्धन, आरोग्य, ग्रामीण पाणीपुरवठा, महिला व बालकल्याण तसेच बांधकाम विभागाने या मोहिमेकडे लक्ष देण्यास सांगून, सलग लागवड, गटलागवड, पाझर तलाव, गावठाणातील जागा, गावठाणांतर्गंत खाजगी जागा, लघुपाटबंधारे विभाग, स्मशानभूमी आणि इतर उपलब्ध मोकळ्या जागांची पाहणी करुन निवड करावी. त्यासाठी हरितसेनेची मदत घेण्याच्या सूचना प्रधान सचिव विकास खारगे यांनी दिल्या.  
जन्म झालेल्या प्रत्येक कुटूंबात पावसाळ्यात १० वृक्ष देण्याचे नियोजन करुन त्यातील पाच वृक्ष हे साग आणि ऊर्वरित  पाच वृक्ष हे फळझाडे असावीत. त्यामध्ये आनंद वृक्ष, शुभमंगल वृक्ष, शुभेच्छा वृक्ष, माहेरची झाडी, स्मृती वृक्षांचा समावेश करावा, असे सांगून शक्य असेल तिथे रस्त्यांच्या दुतर्फा  एकाच जातीची वृक्ष लागवड करुन त्या रस्त्याना नवी ओळखही देता येईल, असेही श्री. खारगे यांनी सांगितले.
 तसेच विविध घरकुल योजनांच्या माध्यमातून नवी घरे बांधकाम, शौचालये बांधकाम केलेल्या परिसरातही वृक्षारोपणावर भर देण्याचे सांगून प्रत्येक विभागाने त्यांच्या पूर्ण क्षमतेनुसार वृक्षारोपण मोहिमेत सहभागी होणे ही काळाची गरज असल्याचे श्री. खारगे म्हणाले.
तसेच शहरातील मोकळ्या जागा, शाळा महाविद्यालयांचा परिसर, रुग्णालये, पशुसंवर्धन रुग्णालये, रस्ते, बगीचे, खाजगी मालकीच्या जागा आदि ठिकाणी मोठ्या प्रमाणावर वृक्षारोपण करण्याची आवश्यकता आहे. मोकळ्या जागांचे निरीक्षण करा. त्या जागा ओळखून त्यांचे वृक्षलागवडीचे सूक्ष्म नियोजन करा. त्यामुळे उद्दिष्ट सहज पूर्ण होणार असल्याचे श्री. खारगे यांनी सांगितले.  
यावेळी नागपूर विभागातील सर्व जिल्हाधिकारी यांनी जुलै २०१९ च्या ३३ कोटी वृक्ष लागवडीबाबतचे नियोजन, पूर्वतयारी, आणि त्याची विद्यमान असलेली प्रगती याबाबतची माहिती प्रधान सचिव विकास खारगे यांना दिली. तसेच महारेशीम संचालनालयाच्या संचालक श्रीमती भाग्यश्री बानायत यांनीही यावेळी त्यांच्या विभागाकडून वृक्षलागवडीबाबतचे सादरीकरण केले. महारेशीम अंतर्गत वृक्षारोपणासाठी राज्य शासनाकडून आवश्यक ती मदत मिळेल,असे प्रधान सचिव विकास खारगे यांनी सांगितले.



  Print






News - Nagpur | Posted : 2019-01-20






Related Photos