अस्वलाच्या हल्ल्यात शेतकरी जखमी : नवरगाव उपवन परिक्षेत्रातील घटना

विदर्भ न्यूज एक्सप्रेस

तालुका प्रतिनिधी / सिंदेवाही : सिंदेवाही वनपरिक्षेत्र कार्यालय अंतर्गत येत असलेल्या नवरगाव उपवन परिक्षेत्रामधील रत्नापूर बिटातील कक्ष क्रमांक ५९६ मध्ये युवकावर अस्वलाने हल्ला करून जखमी केले.

माहितीनुसार, जखमी झालेल्या युवकाचे नाव नरेंद्र शामराव सोनवाने (४४) असून तो रत्नापूर येथील रहिवासी शेतकरी आहे. हा आपल्या शेतावर सकाळी गेला असता १०.२० वाजताच्या सुमारास अस्वलाने त्याच्यावर हल्ला केला. यात नरेंद्र सोनवाने हे जखमी झाले. त्याला ग्रामीण रुग्णालय चंद्रपूर येथे उपचारासाठी दाखल करण्यात आले आहे.

शेतशिवार परिसरात जंगली जनावरांचे हल्ले होत असल्याने शेतकऱ्यांमध्ये भीतीचे वातावरण निर्माण झाले आहे. सदर घटनास्थळी वनविभाग कर्मचाऱ्यांनी पंचनामा करून जखमीला उपचारासाठी चंद्रपूर येथे पाठविले असता त्याच्यावर उपचार सुरू आहेत.