Petrol Price
मोबाईल रीसेट होताच खात्यातून ६८ हजार ९०० रुपये गायब : गुगल-पेद्वारे सायबर फसवणूक
विदर्भ न्यूज एक्सप्रेस
प्रतिनिधी / चंद्रपूर : मोबाईल फोन अचानक रीसेट झाल्यानंतर एका युवकाच्या बँक खात्यातून गुगल-पेद्वारे ६८ हजार ९०० रुपये परस्पर काढून घेतल्याची घटना वरोरा येथे उघडकीस आली आहे. अवघ्या २५ मिनिटांत खात्यातील संपूर्ण रक्कम दुसऱ्या खात्यात वळती करण्यात आली. याप्रकरणी वरोरा पोलिसांनी अज्ञात आरोपीविरुद्ध गुन्हा दाखल केला आहे.
सुनील सुरपसिंग भयडिया २१ वर्षे रा. चिलकापोस्ट, जि. अलीराजपूर, मध्यप्रदेश हा युवक वरोरा येथील महालक्ष्मी कंपनीत डोझर ऑपरेटर म्हणून कार्यरत आहे. त्याचे पंजाब नॅशनल बँकेच्या वरोरा शाखेत बचत खाते असून, हे खाते त्याच्या जिओ मोबाईल क्रमांकाशी जोडलेले आहे.
८ नोव्हेंबर रोजी दुपारी १२.०५ वाजता सुनीलने गुगल-पेद्वारे आपल्या चुलत भावाला दोन हजार रुपये पाठविले. त्यानंतर मोबाईल चार्जिंगला लावून तो आंघोळीसाठी गेला. सुमारे १५ मिनिटांनी परत आल्यानंतर मोबाईल अचानक रीसेट झाल्याचे त्याच्या लक्षात आले.
काही वेळाने गुगल-पेद्वारे व्यवहार करण्याचा प्रयत्न केला असता, बँक खात्यात केवळ ७९ रुपये शिल्लक असल्याचे दिसून आले. त्याने दुसऱ्या मोबाईलवरून खात्याची तपासणी केली असता, दुपारी १२.३० वाजेपर्यंत खात्यातून ६८ हजार ९०० रुपये अन्य खात्यात वळते झाल्याचे उघड झाले.
ही रक्कम ९८८७१६८३७४ या मोबाईल क्रमांकाशी संबंधित दिवलाल गोस्वामी नावाच्या व्यक्तीच्या खात्यात जमा झाल्याचे समोर आले. सुनीलने तत्काळ सायबर क्राईम पोर्टलवर तक्रार नोंदवून वरोरा पोलीस ठाण्यात धाव घेतली. याप्रकरणी पोलिसांनी ९ नोव्हेंबर रोजी अज्ञात आरोपीविरुद्ध माहिती तंत्रज्ञान अधिनियमाच्या कलम ६६ (क), ६६ (ड) आणि भारतीय न्याय संहितेच्या कलम ३१८ (४) अन्वये गुन्हा दाखल केला आहे. पोलीस पुढील तपास करीत आहेत.
, ६६ (ड) आणि भारतीय न्याय संहितेच्या कलम ३१८ (४) अन्वये गुन्हा दाखल केला आहे. पोलीस पुढील तपास करीत आहेत.)
