Petrol Price
बल्लारपूर–खागा, मंझनपूर बसभाड्यात ४२ टक्क्यांनी वाढ : प्रवाशांची आर्थिक लूट
विदर्भ न्यूज एक्सप्रेस
तालुका प्रतिनिधी / बल्लारपूर : दिवाळी आणि छठ महापर्वाच्या पार्श्वभूमीवर उत्तर भारताकडे जाणाऱ्या रेल्वे आणि खासगी बस प्रवासासाठी प्रवाशांची मोठी गर्दी होत आहे. रेल्वेगाड्यांमध्ये तीन महिने आधी आरक्षण करूनही बर्थ मिळणे कठीण झाले असताना, याच संधीचा फायदा घेत बल्लारपूर येथून उत्तर प्रदेशातील खागा आणि मंझनपूरकडे धावणाऱ्या खासगी बसचालकांनी प्रवास भाड्यात अचानक तब्बल ४२.५० टक्क्यांनी वाढ केली आहे. सणासुदीच्या काळात प्रवाशांची आर्थिक लूट सुरू असतानाही परिवहन विभागाचे याकडे दुर्लक्ष होत असल्याने प्रवाशांमध्ये तीव्र नाराजी व्यक्त होत आहे.
चंद्रपूर जिल्ह्यात वेकोलिच्या बल्लारपूर क्षेत्रातील कोळसा खाणी, पेपर उद्योग, गडचांदूर येथील सिमेंट कारखाने तसेच विविध उद्योगांमध्ये उत्तर भारतातील हजारो नागरिक काम करतात. त्यामुळे जिल्ह्याला मिनी इंडिया म्हणूनही ओळखले जाते. दिवाळी आणि त्यानंतर साजरा होणाऱ्या सूर्योपासनेच्या छठ महापर्वासाठी उत्तर प्रदेशातील मूळ गावी जाणाऱ्या नागरिकांची संख्या मोठी आहे. कुटुंबीयांसोबत सण साजरा करण्यासाठी अनेकांनी प्रवासाचे नियोजन केले असले, तरी वाढलेल्या बसभाड्यामुळे त्यांच्या आनंदावर विरजण पडले आहे. बल्लारशाह ते प्रयागराज रेल्वे प्रवासासाठी स्लीपर वर्गाचे भाडे ५८० रुपये, तर तृतीय वातानुकूलित वर्गाचे भाडे १,४८५ रुपये आहे. मात्र, बल्लारपूरहून उत्तर प्रदेशात जाणाऱ्या खासगी शयनयान बसचालकांनी वरच्या आणि खालच्या शयनयान आसनांचे भाडे पूर्वीच्या १,६०० ते १,७०० रुपयांवरून थेट २,५०० रुपयांपर्यंत वाढविले आहे. त्यामुळे प्रवाशांना मोठा आर्थिक भुर्दंड सहन करावा लागत आहे.
विशेष म्हणजे, ज्यांनी अनेक दिवसांपूर्वीच बसचे तिकीट आरक्षित केले आहे, त्यांच्याकडूनही २,००० ते २,२०० रुपये अतिरिक्त भाडे मागितले जात असल्याचा आरोप प्रवाशांनी केला आहे. वाढीव पैसे दिले नाहीत, तर प्रतीक्षेत असलेले अन्य प्रवासी २,५०० रुपये देण्यास तयार आहेत, असे सांगून प्रवाशांवर दबाव टाकला जात आहे. परिणामी, आधीच तिकीट आरक्षित करूनही प्रवाशांना अतिरिक्त पैसे मोजावे लागत असून, आपली फसवणूक झाल्याची भावना त्यांच्यात निर्माण झाली आहे.
सणासुदीच्या काळात प्रवाशांची होणारी ही आर्थिक पिळवणूक थांबविण्यासाठी परिवहन विभागाने तातडीने लक्ष घालावे, खासगी बसच्या भाडेवाढीची चौकशी करावी आणि मनमानी पद्धतीने अतिरिक्त भाडे वसूल करणाऱ्या बसचालकांवर कारवाई करावी, अशी मागणी प्रवाशांकडून होत आहे.
