अपघातानंतर १३ दिवसांनी मृत्यूला कारणीभूत टिप्परचा शोध : चालकासह वाहन ताब्यात


विदर्भ न्यूज एक्सप्रेस
प्रतिनिधी / चंद्रपूर : नागभीड तालुक्यातील तळोधी परिसरात बैलबंडीला धडक देऊन पसार झालेल्या टिप्परचा तळोधी पोलिसांनी अपघाताच्या १३ दिवसांनंतर शोध लावला. या अपघातात गंभीर जखमी झालेल्या ५५ वर्षीय नथ्थु श्रीराम चचाने यांचा उपचारादरम्यान मृत्यू झाला होता. पोलिसांनी टिप्पर क्रमांक एमएच ४० सीडी ४६३२ ताब्यात घेतले असून चालक सचिन दुर्योधन देशमुख ३७ वर्ष , रा. सोमनाळा, ता. भिवापूर, जि. नागपूर याच्याविरुद्ध कायदेशीर कारवाई केली आहे.
१० ऑक्टोबर २०२६ रोजी पहाटे ४ ते ५ वाजताच्या दरम्यान राजेंद्र ऋषिजी कोडापे रा. लखमापूर, ता. नागभीड हे मालक नथ्थु श्रीराम चचाने यांच्यासोबत बैलांसाठी चारा आणण्याकरिता जात होते. यावेळी गोमाजी दामाजी पेट्रोलपंपाजवळ महामार्गावर नागभीडकडून विरुद्ध दिशेने येणाऱ्या भरधाव टिप्परने त्यांच्या बैलबंडीला जोरदार धडक दिली. या अपघातात नथ्थु चचाने यांच्या पायाला गंभीर दुखापत झाली, तर बैलही जखमी होऊन मृत्यूमुखी पडला. अपघातानंतर टिप्परचालक घटनास्थळावरून पसार झाला. गंभीर जखमी नथ्थु चचाने यांचा उपचार सुरू असताना मृत्यू झाला.
या घटनेप्रकरणी तळोधी पोलीस ठाण्यात गुन्हा क्रमांक २६२/२०२६ अन्वये भारतीय न्याय संहिता कलम १२५ (अ), २८१ तसेच मोटार वाहन कायद्याच्या कलम १८४ आणि १३४ अंतर्गत गुन्हा नोंदविण्यात आला होता. अपघातानंतर पसार झालेल्या टिप्परचा शोध घेणे पोलिसांसमोर आव्हान होते. वाहनाचा तांत्रिकदृष्ट्या शोध घेताना अडचणी येत असल्याने तळोधी पोलिसांनी गुप्त बातमीदारांच्या मदतीने तपासाची चक्रे वेगाने फिरवली.
तळोधी मार्गावरून ये-जा करणाऱ्या अवजड वाहनांची माहिती गोळा करताना पोलिसांनी विनाक्रमांकाच्या टिप्परचा शोध सुरू केला. तपासादरम्यान संबंधित वाहन उमरेड, जिल्हा नागपूर येथे असल्याची आणि ते भिवापूर मार्गाने मुलच्या दिशेने जात असल्याची गोपनीय माहिती पोलिसांना मिळाली. त्यानंतर पोलिसांनी वाहनाचा पाठलाग केला. तसेच वाहतूक पोलिसांना माहिती देऊन तळोधी मार्गावर नाकाबंदी करण्यात आली. या कारवाईदरम्यान टिप्पर क्रमांक एमएच ४० सीडी ४६३२ चालक सचिन दुर्योधन देशमुख याच्या ताब्यात मिळून आला. चौकशीदरम्यान त्याने गुन्हा केल्याची कबुली दिल्याचे पोलिसांनी सांगितले. त्यानंतर टिप्पर पोलिसांनी ताब्यात घेतला.
ही कारवाई पोलीस अधीक्षक आयुष नोपानी, अपर पोलीस अधीक्षक ईश्वर कातकडे आणि ब्रह्मपुरीचे उपविभागीय पोलीस अधिकारी साहिल झरकर यांच्या मार्गदर्शनाखाली तळोधीचे ठाणेदार सहायक पोलीस निरीक्षक राहुल गुहे, पोलीस उपनिरीक्षक राजेश उंदिरवाडे, पोलीस हवालदार स्वप्नील चांदेकर तसेच पोलीस अंमलदार संदेश देवगडे, विजय मैद आणि अक्षय हटवार यांनी केली.




Petrol Price




