Petrol Price
ऑनलाइन बुक केलेल्या ४५ हजारांच्या मोबाईलऐवजी साबणाच्या वड्या : वरोऱ्यात फसवणुकीची घटना
विदर्भ न्यूज एक्सप्रेस
प्रतिनिधी / चंद्रपूर : ऑनलाइन बुक केलेल्या ४४ हजार ९९९ रुपये किमतीच्या मोबाईलऐवजी पार्सलमध्ये साबणाच्या वड्या मिळाल्याची घटना वरोरा येथे घडली. या प्रकरणी अंशुल संजीवकुमार सक्सेना रा. गजानन नगर, सरदार पटेल वॉर्ड, वरोरा यांनी २२ ऑक्टोबर रोजी वरोरा पोलीस ठाण्यात तक्रार दाखल केली. तक्रारीनुसार, अंशुल सक्सेना यांनी १६ ऑक्टोबर २०२६ रोजी सायंकाळी ७.५८ वाजता एमआयच्या अधिकृत वेबसाइटवरून रेडमी टर्बो ५ (१२ जीबी रॅम व २५६ जीबी स्टोरेज) हा मोबाईल ऑनलाइन बुक केला होता. या मोबाईलची किंमत ४४ हजार ९९९ रुपये असून, त्यांनी ऑनलाइन पद्धतीने पैसे भरले होते.
२१ ऑक्टोबर रोजी त्यांच्या घरी पार्सल देण्यासाठी तोंडावर कापड बांधलेला एक व्यक्ती मोटारसायकलने आला. त्याने सक्सेना यांच्या पत्नी कल्पना यांना पार्सल आल्याचे सांगून ओटीपी मागितला. त्यावेळी अंशुल सक्सेना हे बीएसएनएल कार्यालयात कामावर होते. पत्नीने फोन करून पार्सल आल्याची माहिती दिल्यानंतर त्यांनी संबंधित व्यक्तीला पार्सल उघडून दाखवण्यास सांगितले. मात्र, ओटीपी मिळताच त्या व्यक्तीने पार्सल त्यांच्या पत्नीच्या हातात दिले आणि मोटारसायकलवरून तेथून निघून गेला.
सायंकाळी घरी परतल्यानंतर सक्सेना यांनी पार्सल उघडून पाहिले असता, त्यामध्ये मोबाईलऐवजी साबणाच्या वड्या आढळल्या. त्यामुळे आपली फसवणूक झाल्याचे त्यांच्या लक्षात आले. यानंतर त्यांनी आपले मानलेले भाऊ यांच्यासोबत संबंधित कुरिअर कंपनीच्या कार्यालयात जाऊन विचारपूस केली. मात्र, तेथे समाधानकारक सहकार्य मिळाले नसल्याचा आरोप त्यांनी तक्रारीत केला आहे. कंपनीच्या कर्मचाऱ्यांनी पोलीस किंवा ग्राहक पंचायतीकडे तक्रार करण्यास सांगून आपली जबाबदारी नाकारल्याचेही त्यांनी नमूद केले.
या घटनेत पार्सल देण्यासाठी आलेल्या व्यक्तीच्या वर्तनाबाबत तसेच मोबाईलऐवजी साबणाच्या वड्या पार्सलमध्ये कशा आल्या, याबाबत सक्सेना यांनी संशय व्यक्त केला आहे. सणासुदीच्या काळात अशा प्रकारे फसवणूक करणारी टोळी सक्रिय असण्याची शक्यताही त्यांनी वर्तवली आहे. या प्रकरणाची गांभीर्याने चौकशी करून संबंधितांचा शोध घ्यावा आणि आपल्याला न्याय मिळवून द्यावा, अशी मागणी अंशुल सक्सेना यांनी वरोरा पोलिसांकडे केली आहे.
