महत्वाच्या बातम्या

स्थायी निगराणी पथकाकडून तपासणी दरम्यान ७ लाखांची रोकड जप्त

विदर्भ न्यूज एक्सप्रेस

प्रतिनिधी / वर्धा : लोकसभा सार्वत्रिक निवणुकीच्या पार्श्वभूमीवर स्थायी निगराणी पथकाकडून ४ एप्रिल रोजी आदित्य पॅलेस जवळ, येळाकेळी येथे चेकपोस्टवर वाहन तपासणी सुरू असतांना वाहन क्रमांक एम.एच. ४९ यू. १६८६ या स्विफ्ट गाडीत ७ लक्ष रुपयांची रक्कम आढळली. या रक्कमेबाबत योग्य ते पुरावे नसल्याने व रक्कम संशयास्पद असल्यामुळे ताब्यात घेवून जिल्हा कोषागार, वर्धा येथे सिलबंद पेटीत जमा करण्यात आली आहे.

राजकीय पक्षाकडून अंमली पदार्थ तसेच रोख रक्कम मतदारांना प्रलोभन देण्याकरिता आणण्याची शक्यता असते. त्यामळे वर्धा तालुक्यात पाच स्थायी निगराणी पथके तयार करण्यात आली आहेत. दुपारी १ वाजताच्या दरम्यान स्थायी निगराणी पथकाकडून वाहन तपासणीचे काम सुरू असतांना वाहन क्रमांक एम.एच. ४९ यू १६८६ या वाहनाची तपासणी केली असता ७ लक्ष रुपयांची रोकड आढळून आली.

वाहन चालक विशाल राजू गुरनूले (२६) रा. भद्रावती जि. चंद्रपूर व सहप्रवाशी कुणाल केशव टापरे (२५), राजु भुजाडे (४३), दिनकर गोगुले (४३) हे भाजीपाला विकुन त्यातून मिळालेली रक्कम ७ लक्ष रुपये आर्वी नाका, वर्धा येथे लग्न कार्याकरिता देण्यासाठी आणत असल्याचे सांगतात. परंतु, योग्य ते पुरावे नसल्याने व रक्कम संशयास्पद असल्यामुळे ताब्यात घेवून जिल्हा कोषागार, वर्धा येथे सिलबंद पेटीत जमा करण्यात आली आहे.

याबाबतचा सविस्तर अहवाल जिल्हा खर्च नियंत्रण समिती, वर्धा यांच्याकडे सादर करण्यात आला आहे, असे उपविभागीय अधिकारी तथा सहाय्यक निवडणूक निर्णय अधिकारी दिपक कारंडे यांनी प्रसिध्दी पत्रकाव्दारे कळविले आहे.