Petrol Price
इंग्रजी आश्रमशाळेच्या ९ धनुर्धरांची शालेय राज्यस्तरीय स्पर्धेसाठी निवड
- नागपूर विभागीय स्पर्धेत खेळाडूंची चमकदार कामगिरी : विविध वयोगटांत पटकावले मानांकन
विदर्भ न्यूज एक्सप्रेस
प्रतिनिधी / गडचिरोली : क्रीडा व युवक सेवा संचालनालय, महाराष्ट्र राज्य, पुणे यांच्या अंतर्गत जिल्हा क्रीडा अधिकारी कार्यालय व जिल्हा क्रीडा परिषद, चंद्रपूर यांच्या संयुक्त विद्यमाने २८ व २९ ऑक्टोबर २०२६ रोजी तालुका क्रीडा संकुल, वरोरा, जिल्हा चंद्रपूर येथे नागपूर विभागीय शालेय धनुर्विद्या स्पर्धेचे आयोजन करण्यात आले होते. या स्पर्धेत गडचिरोली येथील शासकीय इंग्रजी माध्यम आश्रम शाळेतील नऊ खेळाडूंनी विविध वयोगट व प्रकारांत उत्कृष्ट कामगिरी करत शालेय राज्यस्तरीय धनुर्विद्या स्पर्धेसाठी आपली निवड निश्चित केली. खेळाडूंनी मिळविलेल्या या यशामुळे शाळेच्या क्रीडा क्षेत्रातील कामगिरीत मानाची भर पडली आहे.
अंडर-१४ इंडियन राउंडमध्ये ज्योती वेलादी हिने चतुर्थ क्रमांक पटकावला. अंडर-१४ रिकर्व राउंडमध्ये विवेक तुलावी याने तृतीय, तर मुलींच्या गटात प्राजक्ता पोयाम हिने तृतीय क्रमांक मिळविला. अंडर-१४ कंपाउंड राउंडमध्ये आराध्या गोटा हिने तृतीय क्रमांक पटकावला. अंडर-१७ इंडियन राउंडमध्ये सिमरन भोयर हिने प्रथम, तर प्रितिलता पुजेरी हिने द्वितीय क्रमांक मिळविला. अंडर-१७ रिकर्व राउंडमध्ये पियूष मट्टामी याने द्वितीय क्रमांक पटकावला.
अंडर-१९ इंडियन राउंडमध्ये कंचन राऊत हिने द्वितीय, तर अंडर-१९ रिकर्व राउंडमध्ये निकेश हलामी याने तृतीय क्रमांक मिळवून यश संपादन केले. या उल्लेखनीय यशाबद्दल आदिवासी विकास नागपूरच्या अपर आयुक्त आयुषी सिंह ,सहाय्यक जिल्हाधिकारी तथा प्रकल्प अधिकारी अरुण एम. सहाय्यक प्रकल्प अधिकारी वहीद शेख, शरद चौधरी,मुख्याध्यापिका वंदना महल्ले, जिल्हा क्रीडा अधिकारी भास्कर घटाळे, क्रीडा अधिकारी घनश्याम वरारकर, चंद्रशेखर मेश्राम, श्रीराज बदोले, क्रीडा मार्गदर्शक नाजूक उईके, सुप्रसिद्ध बडकेलवार, गडचिरोली जिल्हा धनुर्विद्या संघटनेचे सचिव डॉ. श्याम कोरडे, सुशील अवसरमोल, पायलट प्रोजेक्ट धनुर्विद्या प्रशिक्षण केंद्राचे मार्गदर्शक रोशन सोळंके, कौमुदी श्रीरामवार, अधीक्षक देविदास चोपडे, अधीक्षिका निमा राठोड तसेच शाळेतील शिक्षक व शिक्षकेतर कर्मचाऱ्यांनी खेळाडूंचे अभिनंदन केले.तसेच राज्यस्तरीय स्पर्धेतही खेळाडूंनी अशीच उत्कृष्ट कामगिरी करून गडचिरोली जिल्ह्याचा नावलौकिक वाढवावा, अशा शुभेच्छा दिल्या.
