अपक्ष उमेदवाराचे अपहरण केल्याचा गुन्हा दाखल झालेले काँग्रेस उमेदवार आनंदराव गेडाम फरारच!


विदर्भ न्यूज एक्सप्रेस 
तालुका प्रतिनिधी / आरमोरी
: काँग्रेसचे आरमोरी विधानसभा क्षेत्राचे उमेदवार आनंदराव गेडाम व त्यांच्या मुलासह १३ जणांवर अपहरणाचा गुन्हा आरमोरी पोलीस ठाण्यात दाखल करण्यात आला असून  गुन्हा दाखल झालेले  आनंदराव गेडाम यांच्यासह सर्वजण अद्यापही फरारच आहेत. 
 आरमोरी विधानसभा क्षेत्रातील अपक्ष उमेदवार बग्गुजी ताडाम आपल्या  तीन   साथीदारांसह बुधवार ९ ऑक्टोबर रोजी  रात्री सुकाळा येथून नाटकाच्या उद्घाटनानंतर घरी परत  परत येत होते.   दरम्यान  मतदारसंघातील काँग्रेसचे उमेदवार आनंदराव गेडाम यांचा मुलगा लॉरेन्स व त्याच्या साथीदारांनी पाठलाग करून वैरागड-मनापुर फाट्यावर ताडाम यांची  गाडी अडवून अपहरण  केले. अपक्ष उमेदवार  व त्याच्या साथीदारांना रात्री सलंगटोला येथे थांबवण्यात आले. त्याठिकाणी काँग्रेसचे उमेदवार आनंदराव  गेडाम हे स्वतः उपस्थित होते. त्यांनी बग्गुजी ताडाम यांना शिवीगाळ व मारपीट केली. तसेच उमेदवारी कायम ठेवली परंतु प्रचारातून माघार घेण्याची धमकी दिली. यावेळी  ताडाम यांनी  गोंडी भाषेचा  वापर केला आणि समयसुचकता दाखवत कुटुंबीयांना मोबाईलवर आपले अपहरण झाल्याची सूचना दिली. ताडाम यांच्या मुलाने गुरूवारी सकाळी आठ वाजताच्या सुमारास  आरमोरी पंचायत समितीच्या समोर बग्गुजी ताडाम यांना व त्यांच्या सहकाऱ्यांना घेऊन भरधाव वेगाने येणारी गाडी थांबविली. यानंतर त्यांची सुटका केली. ताडाम व सहकाऱ्यांनी गुरूवारी रात्री आरमोरी पोलीस ठाणे गाठून तक्रार दाखल केली. पोलिसांनी काँग्रेसचे उमेदवार माजी आमदार आनंद गेडाम व त्यांचा मुलगा लॉरेन्स आनंद गेडाम यांच्यासह पंकज प्रभाकर तुलावी, जीवन नाट आणि इतर अशा एकूण ११ जणांवर अपहरणाचे कलम ३६५  सह ३४१ , ३४२ , ३९२, १४३, १४७, ३७(१),(३)  नुसार गुन्हा दाखल केला .  सर्व आरोपी अद्यापही फरारच असून या प्रकरणात  आरमोरी  पोलिस अधिक तपास करीत आहेत.  




  Print






News - Gadchiroli | Posted : 2019-10-12






Related Photos