चिचोली ग्रामपंचायतचा धक्कादायक प्रकार उघडकीस : चक्क आकडा टाकून चोरली वीज

तालुका प्रतिनिधी / धानोरा : धानोरा तालुक्यातील मुख्यालयापासून ५ किलोमीटर अंतरावर असलेल्या चिचोली ग्रामपंचायतीनेच आकडा टाकून बीज चोरल्याचा धक्कादायक प्रकार २५ मे रोजी समोर आला. तब्बल दोन वर्षापासून हा प्रकार सुरू होता, अशी माहितीही समोर आली आहे. विद्युत बील न भरल्याने महावितरणने विद्युत प्रवाह खंडित करून नियमानुसार थकीत असलेले वीज बिल भरण्यास कळविले. त्यानंतर ग्रामपंचायत कार्यालयाने वीज बिल भरणा केला, परंतु त्याची माहिती वीजवितरण कंपनीला दिली नाही. त्यानंतर ग्रामपंचायतीने चक्क आकडा टाकून परस्पर वीज जोडणी घेतली. गुरुवारी चोरून घेतलेला वीजपुरवठा खंडित करून दीडशे फूट वायर जप्त केले. सहायक अभियंता एन. बी. ननावरे व त्यांच्या सहकाऱ्यांनी ही कारवाई केली. उपविभागीय अभियंता देशोपाल शेंडे यांनी कारवाईस दुजोरा दिला.