कनेरी परिसरात वाघाचा वावर : पाच दिवसात चार बैल जखमी
विदर्भ न्यूज एक्सप्रेस
प्रतिनिधी / गडचिरोली : गडचिरोली जिल्हा मुख्यालयापासून ७ कि.मी. अंतरावर असलेल्या कनेरी गाव परिसरातील वीजनिर्मिती प्रकल्पाकडून वैनगंगा नदी घाटाकडे जाणाऱ्या भागात काही दिवसांपासून वाघाचा वावर आहे. हा वाघ लोकांच्या अधूनमधून दृष्टीस पडत असतानाच गेल्या पाच दिवसांत कनेरी येथील चार बैलांना जखमी केले. त्यामुळे येथील नागरिकांमध्ये भीतीचे वातावरण आहे.
कनेरी गाव परिसरात शेतीचा पट्टा लागून आहे. वैनगंगा नदीपर्यंत हा पट्टा विस्तारला आहे. येथे जंगल नाही. काही भागात झुडपे आहेत. तरीसुद्धा या भागात वाघ सकाळी व सायंकाळच्या सुमारास फिरत असतो. सायंकाळी काही लोकांना वाघ दिसला होता. त्यानंतर २० मे रोजी सायंकाळी घराकडे परत येत असलेल्या गायी बैलांच्या कळपावर वाघाने हल्ला करून जखमी केले. यात काही दोन जनावरे जखमी झाली. त्यानंतर पुन्हा दुसऱ्या दिवशी दोन जनावरांवर वाघाने हल्ला केला. यातून जनावरांनी कशीबशी आपली सुटका करून घेतली. आतापर्यंत ४ गायी-बैल वाघाच्या हल्ल्यात जखमी झाले आहेत. यामध्ये यादव समर्थ यांचा एक बैल तर राजू मुळे यांचा एक जर्सी जातीचा बैल गंभीर जखमी झाला. सदर पशुपालकांना आर्थिक मदत द्यावी, अशी मागणी गावातील नागरिक करीत आहेत.
News - Gadchiroli