Petrol Price
राज्यातील अवैध पॅथलॅबना राजाश्रय व बेकायदा पॅथलॅबना दिलेल्या नोटिसा रद्द : आरोग्यमंत्र्यांचे आदेश
विदर्भ न्यूज एक्सप्रेस
वृत्तसंस्था / मुंबई : नोंदणीकृत पॅथॉलॉजिस्टशिवाय चालवल्या जाणाऱ्या अवैध पॅथॉलॉजी लॅबच्या विरोधात सांगली जिल्हा शल्य चिकित्सकांनी त्यांच्या विभागात मोहीम उघडली होती. बेकायदा पॅथलॅबच्या विरोधात गुन्हे दाखल करण्याचे आदेश दिले होते, पण राज्याचे आरोग्यमंत्री तानाजी सावंत यांनी बैठक घेऊन ही कारवाई थांबवण्याचे आदेश दिल्याची माहिती पुढे आली आहे.
कोर्टाचे आदेश
सर्वोच्च न्यायालयाच्या १२ डिसेंबर २०१७ च्या आदेशानुसार पॅथॉलॉजी लॅबमधील रुग्णांचा चाचणी अहवाल नोंदणीकृत पॅथॉलॉजिस्टनीच प्रमाणित करणे बंधनकारक आहे. महाराष्ट्र मेडिकल कान्सिलशी नोंदणीकृत नसलेली व्यक्ती आधुनिक वैद्यक शास्त्राचा व्यवसाय करीत असल्यास तो महाराष्ट्र वैद्यक व्यावसायिक अधिनियम १९६१ च्या कलम ३३ नुसार गुन्हा ठरतो.
८ हजार बेकायदा लॅब
या नियमानुसार आजच्या घडीला राज्यातल्या १३ हजारपैकी सुमारे ८ हजार लॅबोरेटरी या पॅथॉलॉजिस्टविना चालवल्या जात आहेत. त्यातील ७० टक्के शहरी भागांत व महानगरपालिका क्षेत्रात सुरू आहेत. त्यामध्ये काही ठिकाणी तंत्रज्ञ तर दहावी-बारावीपर्यंत शिकलेले आहेत. असे लोक चाचणी अहवाल तयार करून रुग्णांना वितरित करीत आहेत. यामुळे रुग्णांना चुकीचा रिपोर्ट, चुकीचे निदान, चुकीचे उपचार आणि काही वेळा विनाकारण जीवही गमवावा लागतो. अनावश्यक चाचण्यांमुळे रुग्णांची आर्थिक लूट होते असे महाराष्ट्र असोसिएशन ऑफ पॅक्टिसिंग पॅथॉलॉजिस्ट व मायक्रोबायलॉजिस्ट या संघटनेचे अध्यक्ष डॉ. संदीप यादव सांगतात.
कारवाईचे आदेश रद्द
मागील महिन्यात सांगलीच्या जिल्हा शल्य चिकित्सकांनी त्यांच्या क्षेत्रातील सर्व लॅबोरेटरीची तपासणी करून ज्यामध्ये पॅथॉलॉजिस्ट नाहीत अशा लॅब चालकांच्या विरोधात महाराष्ट्र वैद्यक व्यावसायिक अधिनियम १९६१ नुसार गुन्हे दाखल करण्याचे आदेश दिले, पण आरोग्य मंत्री तानाजी सावंत यांनी बैठक घेऊन ही कारवाई थांबवली व या लॅब पूर्ववत सुरू ठेवण्याचे आदेश दिल्याचा आरोप पॅथॉलॉजिस्टच्या संघटनेचे अध्यक्ष डॉ. संदीप यादव यांनी केला. अवैध लॅब चालकांच्या भूलथापांना बळी पडून सांगलीच्या पालक मंत्र्यांनी या नोटिसा रद्द करण्याचे आदेश दिल्याचा आरोपही डॉ. यादव यांनी केला. प्रशासन योग्य कारवाई करत असताना मंत्र्यांनी त्या रोखल्या आणि अवैध लोकांना राजाश्रय दिल्याचा त्यांचा आरोप आहे.
संघटनेच्या मागण्या
- लॅबोरेटरीची नोंदणी प्रक्रिया त्वरित सुरू करावी.
- सांगलीत अवैध लॅबवरील कारवाई थांबवण्याचे दिलेले आदेश मागे घ्यावेत.
- अवैध लॅब चालकांवर तत्काळ व कडक कारवाई करण्याचे आदेश सर्व जिल्हाअधिकारी, जिल्हा शल्य चिकित्सक व महानगरपालिका आयुक्तांना द्यावेत.
News - Rajy
