घुग्घुसमध्ये बुद्ध विहाराच्या संरक्षणासाठी भंतेजींचे आमरण उपोषण चा इशारा

- लॉयड्स मेटल कंपनीला दिलेले ना-हरकत प्रमाणपत्र रद्द करण्याची मागणी; ७ सप्टेंबरपासून आंदोलन
विदर्भ न्यूज एक्सप्रेस
प्रतिनिधी / चंद्रपूर : घुग्घुस येथील शांती नगरातील बोधिसत्व बुद्ध विहार व ध्यान साधना केंद्र, पवित्र बोधीवृक्ष आणि धम्मध्वजाच्या संरक्षणाचा प्रश्न आता गंभीर बनला आहे. या धार्मिक व आध्यात्मिक स्थळांचे संरक्षण करावे तसेच बौद्ध समाजाच्या धार्मिक भावना व श्रद्धेचा सन्मान करावा, या मागणीसाठी ७ सप्टेंबर २०२६ पासून आमरण उपोषण करण्यात येणार आहे. बोधिसत्व बुद्ध विहार व ध्यान साधना केंद्र समितीने लॉयड्स मेटल कंपनीला देण्यात आलेले ना-हरकत प्रमाणपत्र तातडीने रद्द करावे, अशी प्रमुख मागणी केली आहे. यासोबतच बुद्ध विहार, परिसरातील पवित्र बोधीवृक्ष आणि धम्मध्वजाचे संरक्षण करण्यासाठी प्रशासनाने ठोस उपाययोजना कराव्यात, अशी मागणीही करण्यात आली आहे.
समितीच्या म्हणण्यानुसार, बुद्ध विहार हे केवळ धार्मिक स्थळ नसून बौद्ध समाजाच्या श्रद्धा, धम्म आचरण, ध्यानसाधना आणि सामाजिक एकतेचे केंद्र आहे. विहार परिसरातील बोधीवृक्षाला धार्मिक व आध्यात्मिक महत्त्व आहे. तर धम्मध्वज हा भगवान बुद्धांच्या धम्माचे प्रतीक असल्याने या परिसराचे जतन व संरक्षण करणे अत्यावश्यक असल्याचे समितीने स्पष्ट केले आहे.
या प्रश्नासंदर्भात प्रशासन, नगर परिषद आणि संबंधित अधिकाऱ्यांकडे वेळोवेळी निवेदने देण्यात आली. तसेच बैठका घेऊन सातत्याने पाठपुरावा करण्यात आला. मात्र, अद्याप या प्रकरणावर समाधानकारक तोडगा निघालेला नसल्याचा आरोप समितीने केला आहे. त्यामुळे आता शांततामय आणि संविधानिक मार्गाने आमरण उपोषण करण्याचा निर्णय घेण्यात आला आहे.
या आंदोलनाचे नेतृत्व भंते रत्नमनी थेरो, अध्यक्ष, बोधिसत्व बुद्ध विहार व ध्यान साधना केंद्र समिती, शांतीनगर, घुग्घुस करणार आहेत. ७ सप्टेंबर २०२६ पासून शांतीनगर येथील बोधिसत्व बुद्ध विहार परिसरात आमरण उपोषण सुरू करण्यात येणार आहे.
आंदोलनाच्या पार्श्वभूमीवर प्रशासन या प्रकरणात कोणती भूमिका घेते, याकडे आता घुग्घुसकरांचे लक्ष लागले आहे. बुद्ध विहार, पवित्र बोधीवृक्ष आणि धम्मध्वजाचे संरक्षण तसेच कंपनीला देण्यात आलेले ना-हरकत प्रमाणपत्र रद्द करण्याच्या मागणीवर प्रशासन तातडीने तोडगा काढण्यासाठी कोणती पावले उचलते, हे महत्त्वाचे ठरणार आहे.




Petrol Price




